詩篇 13 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

祈求幫助 大衛个詩，交給聖歌隊長。

1上主啊，你毋記得𠊎愛到幾時呢？愛到永遠係麼？

你揞等面毋搭𠊎愛到幾時呢？

2𠊎忍氣吞聲，日夜憂愁愛到幾時呢？

仇敵高高在上贏過𠊎，愛到幾時呢？

3上主 — 𠊎个上帝啊，求你看顧𠊎，應𠊎；

求你使𠊎重見光明，免得睡死掉去。

4莫俾仇敵對𠊎講：

「𠊎贏過佢了！」

莫俾𠊎个敵人因為𠊎橫落去歡喜。

5總講，𠊎倚靠你不變个慈愛；

𠊎个心因為你个拯救會快樂。

6𠊎愛唱歌頌讚上主，

因為佢大施恩，好款待𠊎。