申命記 9 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

以色列人無服從上主

1「以色列人哪，愛注意聽！你等今晡日愛過約旦河，入去佔領比你等較強大个各民族个土地。佢等个城又闊又大，城牆高到堵天。

2該地方住个人又高又大，係亞衲族人个子孫；你等已經聽人講過，無人能㧯亞衲族人對抗。

3總係今晡日，你等會親目看到上主 — 你等个上帝，像烈火恁樣在你等頭前行過去。你等前進个時，佢會打敗佢等，使你等照佢个應許進入，逐出敵人，將佢等消滅。

4「上主 — 你等个上帝為你等逐走敵人後，你等毋好認為上主帶領你等佔領該土地係因為你等个功德，係應該个。毋係恁樣！這係因為該地个住民邪惡，上主正將佢等逐走；

5毋係因為你等心肝好、行為正直，你等正能入去佔領佢等个土地。上主 — 你等个上帝將佢等逐走，係因為這兜人邪惡，又因為佢愛實行佢對你等祖先 — 亞伯拉罕、以撒、雅各所應許个。

6所以，你等愛知，上主 — 你等个上帝將這盡靚个土地賜給你等做產業，絕對毋係因為你等有麼介功德，其實，你等係硬頸个子民。」

拜金牛悖逆上主

7「毋好毋記得你等識在曠野惹上主 — 你等个上帝發譴。對你等離開埃及該日到這下，你等一直悖逆佢。

8甚至在何烈山，你等乜惹上主發譴，佢險險將你等消滅。

9該時𠊎上山去接受兩垤石版 — 該面頂寫等上主㧯你等所立个約。𠊎在山頂停留四十日夜，無食，無啉。

10後來，上主將這兩垤石版交給𠊎。這兩垤石版有上帝親自用手指寫个話，係你等聚集該日，佢在山頂个火焰中講過个話。

11過四十日夜，上主將寫等約个兩垤石版交給𠊎。

12「接等，上主㧯𠊎講：『你遽遽下山，因為你對埃及帶出來个同胞已經敗壞，做邪惡个事。佢等盡遽偏離𠊎命令佢等个道路，為自家鑄造偶像！』

13「上主又㧯𠊎講：『𠊎知這兜人民非常硬頸。

14𠊎愛消滅佢等，完全除掉佢等个名；你毋好阻擋𠊎。𠊎愛俾你成做一個比佢等較強大个國家。』

15「然後𠊎轉身，拿等寫好約个兩垤石版下山；山頂一直𤏸等火。

16𠊎看到你等已經得罪上主 — 你等个上帝，為自家鑄造一隻細牛仔个偶像，盡遽就偏離上主所吩咐你等个道路。

17所以𠊎在你等面前將該兩垤石版抨在地上，抨碎掉。

18𠊎又一擺伏在上主面前，四十日夜無食、無啉。這全部係因為你等行盡邪惡个事來得罪上主，惹佢發譴。

19上主大發譴，譴到愛消滅你等，𠊎非常著驚。總係上主又一擺聽𠊎个祈禱。

20上主在大發譴中也當想愛㓾掉亞倫；當時𠊎也代亞倫祈禱。

21𠊎將你等所鑄造該害你等犯罪个金牛㧹在火底背燒，又打到碎碎，磨到像塵灰恁幼，委在對山頂流下來个溪水肚。

22「在他備拉、瑪撒、基博羅‧哈他瓦个時，你等也惹上主發譴。

23上主喊你等離開加低斯‧巴尼亞，講：『你等去佔領𠊎賜給你等个土地。』總係，你等悖逆上主 — 你等个上帝，毋信靠佢，毋聽從佢。

24對𠊎認識你等以來，你等常常悖逆上主。

25「𠊎伏在上主面前四十日夜，因為𠊎知佢決定愛消滅你等。

26𠊎祈禱講：『至高个上主啊，求你毋好消滅你自家个子民。佢等係你用大能大力對埃及救出來个，佢等係你个產業。

27求你紀念你个僕人 — 亞伯拉罕、以撒、雅各，莫看你子民个硬頸、邪惡、㧯罪過。

28若毋係恁樣，埃及人會講，你無法度帶領佢等到你應許給佢等个土地。佢等會講，你當惱你自家个子民，你帶領佢等去曠野，係愛㓾掉佢等。

29總係這人民係你个產業，係你揀選做自家子民个，係你用大能大力對埃及帶領出來个。』」