以賽亞書 25 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

頌讚个詩歌

1上主啊，你係𠊎个上帝；

𠊎愛尊敬你，稱頌你个名。

因為你係信實个，你行神蹟奇事；

你實現古早已經定好个計劃。

2你使城市變做石堆；

你使城堡變做荒埔。

外邦人起个宮殿已經荒廢，

永遠無法度重建起來。

3所以，剛強个人民會讚美你；

強國个城市會敬畏你。

4貧窮个人倚靠你，

困苦个人對你得到安全。

你做佢等暴風雨中个避難所，

使佢等在熱天个日頭下遮涼。

殘暴人个攻擊像冬天个狂風 ，

5也當像沙漠底背迫人个熱氣。

總係上主啊，你塞敵人个嘴；

你阻止外邦暴民个吵鬧，

就像雲个陰影除掉熱氣。

上帝預備筵席

6在錫安山，上主 — 萬軍个元帥愛為天下萬國準備筵席，有滂沛个食物，盡香盡好个老酒。

7在這山頂，佢愛拉下萬民悲傷幪面个面帕，除掉揜等列國頭那頂个布篷。

8佢愛將死亡永遠除掉！至高个上主愛拭燥逐儕个目汁，除掉佢子民在各國所受到个羞恥。上主恁樣宣佈了。

9該時，逐儕愛講：「佢確實係𠊎等个上帝；𠊎等一直信靠佢，佢就拯救𠊎等。佢係上主，𠊎等一直信靠佢。𠊎等愛歡喜快樂，因為佢已經拯救𠊎等。」

上帝愛責罰摩押

10上主愛保護錫安山；總係摩押人會被人踐踏，像禾稈被人㧒落糞堆中做肥。

11佢等會在糞堆中伸出手來，像人愛泅水；總係上帝愛羞辱佢等，使佢等驕傲个手軟下來。

12上帝愛毀壞摩押人个城堡，拆掉城牆，拆到平平，成做泥粉。