1這兜事以後，在提比哩亞湖邊 ，耶穌又對學生顯現。這擺顯現个經過係恁樣个：
2該時，西門‧彼得、偏名雙生仔个多馬、加利利个迦拿人拿但業、西庇太个兩個孻仔，㧯另外兩個學生共下在該位。
3西門‧彼得對佢等講：「𠊎愛去打魚仔。」
佢等講：「𠊎等也跈你去。」所以佢等出去，上船；總係歸暗晡無打到半尾。
4天一光，耶穌企在湖滣，總係學生毋知佢係耶穌。
5耶穌對佢等講：「朋友，你等有打到魚仔無？」
佢等講：「無。」
6耶穌講：「將網仔委在船个右片，就會打到。」佢等就照佢个話委網仔下去，結果拉毋上來，因為網到忒多魚仔。
7耶穌所惜个該學生對彼得講：「係主！」西門‧彼得一聽講係主，黏時拿一領衫圍等 (該時佢打赤膊)，跳落水底背。
8其他个學生將船仔撐近湖滣，將歸網魚仔拖過來。當時佢等離湖滣無幾遠，差毋多一百公尺。
9佢等上岸，看到一堆火炭火，頂高有魚仔，又有餅仔。
10耶穌㧯佢等講：「拿幾尾你等正打到个魚仔來。」
11 西門‧彼得上船去，將網仔拖上陸地；網肚有一百五十三尾大魚。雖然有恁多魚仔，總係網無爛掉。
12耶穌㧯佢等講：「你等來食朝。」無一個學生敢問佢講：「你係麼人？」因為佢等知佢就係主。
13耶穌就行過去，拿餅仔分給佢等，然後又拿魚仔分給佢等。
14這係耶穌對死復活後，第三擺對學生顯現。
耶穌㧯彼得15佢等食飽以後，耶穌問西門‧彼得講：「約翰个孻仔西門，你愛𠊎比這兜較多麼？」
佢應講：「主啊，係，你知𠊎愛你。」
耶穌講：「你愛飼𠊎个細羊仔。」
16耶穌第二擺問：「約翰个孻仔西門，你愛𠊎麼？」
佢應講：「主啊，係，你知𠊎愛你。」
耶穌㧯佢講：「你愛掌𠊎个羊仔。」
17耶穌第三擺又問佢：「約翰个孻仔西門，你愛𠊎麼？」
彼得因為耶穌連連三擺問佢，「你愛𠊎麼？」就憂愁；佢對耶穌講：「主啊，你無所不知，你知𠊎愛你。」
耶穌講：「你愛飼𠊎个羊仔。
18𠊎實在㧯你講，你後生个時，自家繫腰帶，自由來去；總係年老个時，你會伸出手來，別人會將你䌈等，帶你到你無愛去个所在。」
19(耶穌講這個話係指彼得會樣般死，來榮光上帝。) 接等，耶穌又㧯佢講：「你來跈𠊎！」
耶穌㧯佢所惜个該學生20 彼得轉身，看到耶穌所惜个該學生跈等來。 (該學生識在食夜个時探身問耶穌講：「主啊，愛出賣你个係麼人？」)
21彼得看等佢，問耶穌講：「主啊，這人將來樣般？」
22耶穌應講：「𠊎若愛留佢个命到𠊎再來，干你麼介事？你跈𠊎就著！」
23所以，這個話流傳在跈耶穌个人當中，講該學生毋會死。其實，耶穌並無講佢毋會死，只有講：「𠊎若愛留佢个命到𠊎再來，干你麼介事？」
24這個學生就係為這兜事做見證个人；佢將這兜事記下來。𠊎等知佢个見證係真个。
結尾个話25耶穌還做盡多別个事，若係一一記下來，𠊎想世界也無法度容納恁多書。
Who We AreWhat We EelieveWhat We Do
2025 by iamachristian.org,Inc All rights reserved.
