傳道書 11 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

智慧人个所做

1愛將你个糧食委在水面 ，

因為將來會收轉來。

2愛將你个額分做七份，抑係八份，

因為你毋知在這世上會堵到麼介災禍。

3樹仔無論向南向北橫下，

橫到㖠位，就放在該位。

雲个水氣充足，雨就落下來。

4若係你愛等風調雨順正來耕種，

你就毋使委種，你也毋會有好收割。

5風吹个路線你毋知；你也無辦法知孲𤘅 樣般在婦人家个肚笥成形；你還較無辦法明白創造萬物个上帝樣般工作。

6你朝晨暗晡全部愛去委種；因為你毋知所委个種係毋係全部會生，也毋知朝晨頭委个會比暗晡頭委个較好，抑係共樣。

7光係盡好，看得到日光係樣般快樂啊！

8人食幾多歲，就做得享受幾多年。總係愛記得，死後个烏暗還較長。將會來个事全部係空虛。

勸話後生人

9後生人哪，快樂過你个青春！趕還後生歡喜快樂啊！照你心所想㧯目珠所看个去做你歡喜个事！總係愛記得，上帝愛照你所有个行為審判你。

10所以你愛對心肚除掉煩勞，對肉體除掉痛苦，因為後生㧯青春係空虛个。