帖撒羅尼迦前書 4 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

俾上帝歡喜个生活

1最後，兄弟姊妹啊，你等已經對𠊎等學到愛樣般在生活上俾上帝歡喜；事實上，你等也一直係恁樣行。這下，𠊎等奉主耶穌个名勸你等，求你等，愛更加打拚。

2你等知，𠊎等通過主耶穌个權柄所教你等个係麼介。

3上帝个旨意係愛你等聖潔，遠離淫亂个事；

4每一個人愛知樣般用聖潔㧯尊貴个方式來保守自家个身體 ；

5毋好放縱情慾，像該兜毋識上帝个異教徒恁樣。

6在這種事上，毋好有對毋起抑係欺負兄弟姊妹个行為。𠊎等已經對你等講，也識警告你等：主定著會責罰該兜做這種事个人。

7上帝呼召𠊎等，毋係愛𠊎等生活在淫亂中，係愛𠊎等聖潔。

8所以，拒絕這種教訓个，毋係拒絕人，係拒絕賜聖靈給你等个上帝。

9關係惜兄弟姊妹，𠊎毋使寫信仔同你等討論；上帝已經教你等愛樣般彼此相惜，

10你等也係照這教訓對待全馬其頓个眾兄弟姊妹。總係，兄弟姊妹啊，𠊎等還係愛勸你等：更加打拚，

11立志安份守己，親手做事來維持自家个生活，像𠊎等頭擺吩咐你等恁樣，

12使你等得到該兜無信个人个尊敬，也毋使靠別人个供給。

主个再來

13兄弟姊妹啊，關係已經睡掉个人，𠊎等無愛你等毋知，免得你等憂愁，像該兜無盼望个人。

14𠊎等相信耶穌已經死又復活，所以𠊎等相信，該兜信耶穌个人死後，上帝也會將佢等同佢共下帶轉去 。

15𠊎等這下照主个教訓㧯你等講：𠊎這兜生等、存留到主再來个人，毋會比該兜已經睡个人先同主相會。

16該時，會有發命令个聲，天使長个聲，㧯上帝个號筒聲，然後，主本身會對天頂降下來。相信基督，已經死掉个該兜人會先復活；

17接等，𠊎這兜生等還存留个人攏總會同佢等共下受接到雲頂去，在空中同主相會。恁樣，𠊎等就永遠㧯主同在了。

18所以，你等愛用這兜話彼此安慰。