1 希西家二十五歲个時做猶大王，在耶路撒冷統治二十九年。厥姆亞比雅係撒迦利雅个妹仔。
2希西家學厥祖先大衛王个模樣，行上主看做著个事。
潔淨聖殿3 希西家做王該年个第一隻月，佢重新將上主聖殿个門打開來，並進行修整个工作。
4佢召集祭司㧯利未人到聖殿个東院，
5在該位對佢等講：「利未人哪，愛聽𠊎講：這下你等愛潔淨自家；你等也愛潔淨上主 — 你等祖先上帝个聖殿，將所有屙糟个東西除掉。
6𠊎等个祖先對上主 — 𠊎等个上帝毋忠誠，行佢看做邪惡个事，離開佢，轉面背向上主所住个所在。
7佢等將聖殿个門關起來，由在燈火烏掉，毋燒香，也無在以色列上帝个聖殿獻燒化祭。
8所以，上主向猶大㧯耶路撒冷發譴。上主个行動使人著驚、恥笑佢等。這一切你等全部當清楚。
9看哪！𠊎等个祖先死在戰場，𠊎等个𡜵娘子女被人捉去。
10「這下，𠊎決定㧯上主 — 以色列个上帝立約，佢个發譴正會離開𠊎等。
11𠊎親愛个利未人哪，毋好延纏；你等係上主揀選來向佢燒香个人，愛領導人民敬拜佢。」
12-14在該位个利未人有：
哥轄宗族：亞瑪賽个孻仔瑪哈㧯亞撒利雅个孻仔約珥；
米拉利宗族：亞伯底个孻仔基士㧯耶哈利勒个孻仔亞撒利雅；
革順宗族：薪瑪个孻仔約亞㧯約亞个孻仔伊甸；
以利撒反宗族：申利㧯耶利；
亞薩宗族：撒迦利雅㧯瑪探雅；
希幔宗族：耶歇㧯示每；
耶杜頓宗族：示瑪雅㧯烏薛。
15這兜人召集佢等个利未族兄弟，全部照禮儀潔淨自家，然後照王个命令、根據上主个法律開始潔淨上主个聖殿。
16祭司入去潔淨上主个聖殿。佢等將所有無淨浰个東西搬到聖殿个庭院，利未人將它兜搬出城外，㧒落汲淪溪。
17這項工作在正月初一開始，到第八日就全部完工，連聖殿个前堂也拚淨了。然後佢等又工作八日，到正月十六，將聖殿準備好勢。
重新奉獻聖殿18 利未人向希西家王報告講：「𠊎等已經將上主个聖殿照禮儀拚淨了，包含獻燒化祭个祭壇、放供餅个桌仔，㧯所有附帶个用品全部淨浰了。
19𠊎等也將亞哈斯王違背上帝該時所徙走个東西全部準備好勢；𠊎等已經將它兜重新奉獻，這下全部放在上主个祭壇前。」
20第二日打早，希西家王召集城肚該兜領袖，共下到上主个聖殿去。
21為到愛贖王室个罪、猶大人民个罪，並潔淨聖殿，佢等帶來七隻牛牯，七隻綿羊牯，七隻細羊牯，七隻山羊牯。王吩咐亞倫後代个祭司將這兜動物做牲儀獻在上主个祭壇頂。
22祭司先㓾牛，正㓾綿羊，然後㓾細羊仔，將逐隻牲儀个血洒在祭壇頂；
23最尾將該兜做贖罪祭个山羊牯牽到王㧯其他敬拜个人面前，佢等就按手在山羊頭那頂。
24然後祭司㓾山羊做牲儀，將血倒在祭壇頂，除掉所有人民个罪，因為王命令愛為全部以色列人民獻燒化祭㧯贖罪祭。
25 希西家照上主通過先見迦得㧯先知拿單給大衛王个指示，派利未人在上主个聖殿肚，拿等豎琴、七弦琴㧯鑇仔；這就係上主通過先知所吩咐个。
26利未人拿等大衛時代所用个樂器，祭司也拿等喇叭企在該位。
27希西家命令在祭壇頂獻燒化祭。獻祭一開始，人民就頌讚上主，祭司歕喇叭，琴師樂隊彈奏以色列王大衛其他个樂器來和。
28所有个會眾參加敬拜，唱歌个唱歌，歕喇叭个歕喇叭，一直到牲儀燒掉。
29然後希西家王㧯全部人民跪落去拜上帝。
30王㧯該兜領袖吩咐利未人頌讚上主，唱大衛王㧯先見亞薩所做个讚美詩。民眾全部歡歡喜喜唱詩，又跪落去拜上帝。
31 希西家對民眾講：「這下你等全部淨浰了，將頭牲帶來做感謝祭獻給上主！」佢等就聽王个話，有兜人也自願帶頭牲來做燒化祭。
32總共有七十隻牛牯，一百隻綿羊牯，兩百隻細羊牯做燒化祭獻給上主；
33還有分別為聖个六百隻牛牯㧯三千隻綿羊，係給民眾食个牲儀。
34因為頭牲忒多，負責㓾个祭司毋罅，佢等个同族利未人就幫助佢等，直到工作結束。該時，有較多个祭司潔淨自家。 (原來利未人比祭司較忠心遵守潔淨个規定。)
35除了盡多燒化祭以外，還有盡多平安祭个油，並燒化祭共下獻个祭酒，一一處理。
恁樣，上主聖殿肚个事奉就重新恢復了。
36希西家王㧯人民全部當快樂，因為上帝幫助佢等將這兜事當遽就做好。
Who We AreWhat We EelieveWhat We Do
2025 by iamachristian.org,Inc All rights reserved.
