1過無幾久，摩押、亞捫㧯同盟米烏尼人 个軍隊侵犯猶大，愛攻打約沙法王。
2有人報告約沙法講：「以東
該片有大軍對死海對面來攻擊你；佢等已經佔領哈洗遜‧他瑪。」 (哈洗遜‧他瑪又安到隱‧基底。)3約沙法著驚，決定祈求上主帶領，然後命令全國禁食。
4人民對猶大逐城來到耶路撒冷，祈求上主个帶領。
5佢等㧯耶路撒冷人民聚集在聖殿个新庭院肚。約沙法王企在佢等个面前，
6大聲祈禱講：
「上主 — 𠊎等祖先个上帝啊，你對天頂統治地上萬國；你有大能大力，無人有辦法抵擋你。
7𠊎等个上帝啊，你个子民以色列徙到這位个時，你逐走這所在个原住民，將這土地賜給你个朋友亞伯拉罕个後代，永遠屬佢等。
8佢等一直住在這位，也起聖殿榮光你个名。佢等知，
9若係有災難臨到佢等，責罰佢等，像戰爭 、發瘟、飢荒，佢等做得來到這座敬拜你个聖殿，企在殿个面前；佢等在災難中向你呼求，你就聽佢等，拯救佢等。
10「這下，亞捫人、摩押人㧯以東人來攻打𠊎等。以前𠊎等个祖先對埃及出來个時，你毋准佢等入去該兜人个國內，所以𠊎等个祖先行別條路，無消滅佢等。
11這下佢等反轉恁樣報復𠊎等！佢等想愛對你親自賜給𠊎等个土地將𠊎等逐走。
12𠊎等个上帝啊，求你刑罰佢等，因為𠊎等無力量來對抗這來攻打𠊎等个大軍。𠊎等毋知愛樣般做，只有仰望你。」
13 猶大所有个男人，㧯佢等个𡜵娘子女，企在聖殿面前。
14上主个靈降在眾人當中一個利未人身上。佢安到雅哈悉，係撒迦利雅个孻仔；佢屬亞薩宗族，係瑪探雅个玄孫、耶利个曾孫、比拿雅个孫仔。
15雅哈悉講：「約沙法王、猶大㧯耶路撒冷所有个人民哪，上主講，你等毋使愁，也毋使驚恁強大个敵軍。決定戰爭个輸贏係上帝，毋係你等。
16天光日，佢等對洗斯路口上來个時，你等去對抗佢等。你等會在耶魯伊勒曠野前个山壢口堵到佢等。
17這場戰爭你等毋使打；單淨擺陣企穩來，你等會看到上主使你等得勝。猶大㧯耶路撒冷个人民哪，毋使愁，也毋使驚。天光日你等去面對佢等！上主會㧯你等共下！」
18所以，約沙法王跪下來，伏在地上；猶大㧯耶路撒冷所有个民眾也㧯佢共下伏等敬拜上主。
19利未支族个哥轄㧯可拉族人企起來，大聲頌讚上主 — 以色列个上帝。
20第二日打早，人民到提哥亞附近个曠野去。佢等出發个時，約沙法對佢等講：「猶大㧯耶路撒冷个人民哪，愛信靠上主 — 你等个上帝，你等就企得穩；愛相信上主先知个話，你等就一定成功。」
21王對人民講煞，命令歌手著特別節期時著个衫 ，行在軍隊頭前，透路大聲唱：
「讚美上主！
佢个慈愛永遠長存！」
22佢等開始唱歌讚美个時，上主使來侵犯个敵軍亂淨淨了，打輸掉了。
23亞捫人㧯摩押人攻打以東人个軍隊，將佢等全部消滅，然後轉過來彼此相㓾。
24猶大軍隊來到曠野个一座塔，向敵軍个陣地看，看到滿遍屍體，無一個走掉。
25 約沙法㧯佢个軍隊就去搶戰利品；佢等尋到盡多頭牲 、用品、衫褲㧯其他值錢个東西。佢等用三日个時間收集戰利品，總係還係盡多拿毋走。
26第四日，佢等聚集在比拉加山壢肚頌讚上主。所以這山壢安到「比拉加」，直到今晡日。
27約沙法帶領得勝个軍隊歡歡喜喜轉去耶路撒冷，因為上主打贏佢等个仇敵。
28佢等一路彈琴、七弦琴、歕喇叭轉到城肚，入去上主个聖殿。
29逐國聽到上主樣般打贏以色列仇敵个消息全部當驚上帝。
30恁樣，在約沙法統治期間國家太平；上帝賜給佢四境平安。
約沙法統治个結束(列王紀上 22:41-50)31 約沙法三十五歲个時做猶大王，在耶路撒冷統治二十五年。厥姆係示利希个妹仔阿蘇巴。
32約沙法行厥爸亞撒無偏離个路，全部做上主看做著个事。
33總係，佢無廢掉山岡頂个神廟；人民還係無全心全意敬拜佢等祖先个上帝。
34 約沙法其他个事，對頭到尾，記在《哈拿尼个孻仔耶戶史》底背；這書係《以色列列王史》中个一卷。
35有一擺，猶大王約沙法㧯做盡壞事个以色列王亞哈謝結盟；
36佢等在以旬‧迦別港造一隊遠航个船仔。
37瑪利沙城人多大瓦个孻仔以利以謝預言警告約沙法講：「因為你㧯亞哈謝結盟，上主愛毀壞你所造个船仔。」後來該兜船仔斷真壞掉，從來毋識出海。
Who We AreWhat We EelieveWhat We Do
2025 by iamachristian.org,Inc All rights reserved.
