1 摩押个難民 對曠野个西拉城送一隻細羊 給錫安山當權个人做禮物。
2這兜難民在亞嫩河壩滣个渡船頭，像被人逐出藪个鳥子，飛來飛去，毋知樣般正好。
3佢等問猶大人：「請指教𠊎等，𠊎等應該樣般做？求你等保護𠊎等，在當晝頭也有陰影像暗晡頭共樣，將𠊎等難民囥起來；莫俾人尋到𠊎等。
4𠊎等對摩押被人逐出來，愛去住在你等个當中。請保護𠊎等，使𠊎等能脫離毀滅者个手。」
(欺負㧯毀滅定著會停掉；侵略者一定會消滅。
5然後有一個大衛个子孫會做王；佢愛用信實㧯慈愛來統治人民。佢愛尋求公道，趕緊實行正義。)
6 猶大个人民講：「𠊎等聽講摩押人民非常驕傲。佢等自高自大，總係佢等个誇口全部係肨風个。」
7 摩押人民會為摩押个災難來悲傷。佢等回想在吉珥‧哈列設食葡萄餅个時，儕儕流目汁噭，全部悲傷絕望。
8希實本个田園㧯西比瑪个葡萄園全部毀滅掉。該兜葡萄園所焗个酒，識使各國个統治者醉到橫下去。有一時期，它兜个葡萄藤一直向北伸到雅謝，向東伸到曠野，向西伸到死海對面；
9這下𠊎為西比瑪个葡萄樹悲傷，像為雅謝人哀傷一樣。𠊎為希實本㧯以利亞利目汁流到像落水一樣，因為在佢等收成果子㧯五榖个時，戰爭个嘶聲忽然臨到。
10毋會再有人為田園當肥來歡喜；毋會再有人為葡萄園歡喜唱歌；毋會再有人在醡酒池踏葡萄。歡喜快樂个聲已經煞掉了 。
11𠊎个心為摩押像琴出聲，為吉珥‧哈列設傷心。
12摩押人民常常到山頂逐個神廟去祈求，求到會痶死，總係完全無效。
13以上係上主以前所宣告有關摩押个信息。
14這下，上主講：「三年內，照長工个年限，摩押个榮光全部會喪失，只有少數个人民有好存留；佢等也賸無幾多，十分衰弱。」
Who We AreWhat We EelieveWhat We Do
2025 by iamachristian.org,Inc All rights reserved.
