約伯記 2 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

撒但又試探約伯

1又有一日，天頂个眾神子 再來朝見上主，撒但也在佢等當中。

2上主問撒但：「你對㖠位來啊？」

撒但應講：「𠊎在地上逐位行來行去，然後轉到這位來。」

3上主問撒但：「你有注意到𠊎个僕人約伯麼？世間無一儕像佢恁好：做人正直，敬畏𠊎，遠離壞事。你雖然激𠊎攻擊佢，無緣無故蹧踏佢，總係佢還係像頭擺恁樣對𠊎忠心。」

4撒但應講：「『用皮換皮！』人放掉所有个一切來換自家个生命，逐儕乜甘願。

5總係你若係出手傷害佢个身體，佢一定會當面咒罵你！」

6上主對撒但講：「好啊，佢在你个手中，總係愛留佢个生命。」

7撒但就對上主面前出去，開始打擊約伯，使佢對腳底到頭那頂發毒瘡。

8約伯去坐在火灰肚，拿一垤瓦析刮自家身項个毒瘡。

9厥𡜵娘對佢講：「你到這下還堅持你个忠心嗎？咒罵上帝，去死好哪！」

10 約伯應講：「你這個婦人家樣會恁憨蚩！敢講上帝賜福給𠊎等，𠊎等就歡喜，佢降災禍，𠊎等就咒罵佢係麼？」雖然約伯堵到恁多痛苦，佢還係毋開嘴咒罵上帝來犯罪。

約伯个朋友來看佢

11 約伯有三個朋友，就係提幔人以利法、書亞人比勒達，㧯拿瑪人瑣法。佢等聽到約伯堵到這一切个災禍，逐儕就離開屋下，湊等去看佢，安慰佢。

12佢等遠遠就看到約伯，總係認毋出係佢，等到認出係佢，就開聲大噭，逐儕扯爛自家个外衫，向天頂委塵灰，委在自家頭那頂。

13然後佢等同約伯共下坐在地上，七日七夜無講一句話，因為佢等看到約伯个痛苦恁大！