詩篇 142 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

求幫助个祈禱 大衛在山窿肚所作个教訓詩，一篇祈禱文。

1𠊎出聲哀求上主；

𠊎大聲對佢懇求。

2𠊎對佢拚出𠊎所有个苦情，

將𠊎一切个患難講給佢聽。

3𠊎个心神發咄愕个時，

係佢清楚知𠊎个道路。

在𠊎所行个路上，

仇敵設好機關愛害𠊎。

4𠊎看來看去，

尋無人好𢯭手；

𠊎也尋無路好逃走；

無人關心𠊎个生死。

5上主啊，𠊎對你哀求，講：

「你係𠊎个避難所，

係𠊎今生一切个福份。」

6求你聽𠊎求喊个聲，

因為𠊎在絕望中。

求你救𠊎脫離迫害𠊎个人，

因為佢等比𠊎較強盛。

7求你救𠊎脫離災難 ，

好俾𠊎頌讚你个名。

義人就會圍等𠊎，

因為你施恩好款待𠊎。