士師記 10 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

陀拉

1 亞比米勒死後，朵多个孫仔、普瓦个孻仔陀拉興起，來解救以色列人。佢係以薩迦支族人，住在以法蓮山區个沙密。

2陀拉做以色列个士師二十三年。佢死掉，埋葬在沙密。

睚珥

3 陀拉死後，有基列人睚珥興起，做以色列个士師二十二年。

4佢有三十個孻仔，騎三十隻驢仔。佢等在基列一帶有三十座城；到今晡日這兜城還喊做哈倭特‧睚珥

。

5睚珥死掉，葬在加們。

耶弗他

6 以色列人民又行上主看做邪惡个事。佢等拜該兜巴力㧯亞斯她錄，還有敘利亞、西頓、摩押、亞捫、非利士个神明。佢等離開上主，毋敬拜佢。

7上主向以色列人發譴，將佢等交在非利士人㧯亞捫人个手中。

8佢等迫害並欺負住在約旦河東片、亞摩利人境內、基列一帶个以色列人，總共十八年，

9亞捫人又過約旦河去攻打猶大、便雅憫、㧯以法蓮支族。以色列人就堵到極大个困苦。

10所以，以色列人求喊上主，講：「𠊎等得罪你；𠊎等離開𠊎等个上帝去拜該兜巴力。」

11上主應講：「頭擺埃及人、亞摩利人、亞捫人、非利士人、

12西頓人、亞瑪力人、㧯馬雲人欺負你等，你等求喊𠊎，敢講𠊎無解救你等係麼？

13總係，你等還係離開𠊎，去拜別个神明！所以，𠊎無愛再救你等了。

14你等去求喊你等所選个神明啊！你等堵到災難个時，俾佢等來救你等啊！」

15總係，以色列人對上主講：「𠊎等已經犯到罪了；由在你愛樣般對待𠊎等！總係求你今晡日解救𠊎等！」

16接等，佢等就除掉外國个神明，敬拜上主。上主因以色列所受个困苦心肝盡艱苦。

17該時，亞捫人个軍隊在基列安營，準備相㓾。以色列人也聚集，在基列个米斯巴安營。

18住在基列該片个以色列人㧯逐支族个領袖攏總恁樣講：「麼人先去攻打亞捫人，麼人就做基列人民个領袖。」