1𠊎个情妹啊，你實在非常靚！
你个目珠在面紗後背像月鴿仔恁溫柔。
你个頭那毛像一群烏山羊，
對基列山頂緊行等下來个樣。
2你个牙齒像正剪過毛个羊，
全部洗到白淨白淨上來；
它兜雙雙對對排等，
一支牙齒都無缺掉。
3你个嘴唇像紅色个絲帶，
開嘴講話个時盡得人惜。
你兩片个面頰卵在面紗後背，
紅潤到像分做兩析个石榴。
4你个頸筋像大衛个高塔，
起到當堅固又非常高貴；
你个頸筋所掛等个脖鍊，
就像歸千隻勇士个盾牌。
5你个兩粒乳菇像一對細鹿仔，
像雙生个羚羊在百合花當中食草。
6𠊎愛去沒藥山，
到乳香岡頂高，
等到清早个涼風吹來，
烏暗漸漸仔離開个時。
7𠊎个情妹啊，你實在盡靚！
你完全無一些缺點！
8𠊎个新娘啊，請㧯𠊎共下離開黎巴嫩山，
㧯𠊎共下對黎巴嫩下來 。
請你遽遽對亞瑪拿个山頂，
對示尼珥山㧯黑門山下來，
就係獅仔㧯豹仔住个所在。
9𠊎个阿妹 ，𠊎个新娘啊，
你个目珠一打眼拐，
你頸筋个脖鍊一搖，
𠊎个魂就被你鉤走了！
10𠊎个阿妹，𠊎个新娘啊，
你个愛情實在盡甜。
你个愛情比酒還較香；
你膏油个香味贏過所有个香料。
11𠊎个新娘，你个嘴唇甜到像蜂糖；
你个舌乸有蜂糖㧯乳个味道。
你衫褲个香氣像黎巴嫩个香氣。
12𠊎个阿妹，𠊎个新娘，
你像係鎖等个花園、
圍等个井、封掉个泉源。
13園中果子樹盡多，
有石榴樹結盡靚个果子；
有鳳仙花、哪噠樹，
14有哪噠、番紅花、菖蒲、肉桂，
㧯逐樣乳香木，
還有沒藥、沉香，
㧯各種高貴个香料。
15你係園中个泉水，
係湧出个井水，
係對黎巴嫩山流下來个溪水。
(新娘)16北風啊，好醒了，
南風啊，吹入𠊎个花園來，
使空氣充滿香味。
願𠊎个情郎入到佢个園中，
食園肚最好个果子。
Who We AreWhat We EelieveWhat We Do
2025 by iamachristian.org,Inc All rights reserved.
