何西阿書 10 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1 以色列人係多產个葡萄樹。佢等越繁榮，祭壇越增加；佢等个土地出產越豐富，所拜个石柱像也打扮到越靚。

2佢等心懷詭詐，所以這下一定愛因自家个罪受責罰。上帝愛拆掉佢等个祭壇，打壞佢等所拜个石柱像。

3佢等就會講：「𠊎等無君王，因為𠊎等毋敬畏上主。總係，君王到底能為𠊎等做麼介呢？」

4佢等講空話，立假誓，定無效个條約。難怪，人打官司就像毒草生滿犁好个田。

5 撒馬利亞个人民愛為到伯‧亞文

个金牛像當著驚。佢等㧯中意這偶像个祭司，全部愛因金牛像失掉原旦个光榮就盡悲傷。

6這偶像會被人帶到亞述，做禮物獻給亞述大王。以色列會盡見笑，佢等會因為拜偶像堵到見笑。

7撒馬利亞个君王會被人捉去，像細樹桍被水沖走。

8伯‧亞文

山岡頂个祭壇，就係以色列人犯罪个所在，全部愛毀滅。佢等个祭壇會生滿竻仔㧯蒺藜。佢等會向大山講：「將𠊎等揜等！」對細山講：「磧在𠊎等身上啊！」

上主審判以色列

9上主講：「自從在基比亞

犯罪以後，以色列人一直得罪𠊎，佢等恅到對付邪惡人民个戰爭毋會臨到佢等。

10𠊎愛隨意責罰佢等。列國愛聯合起來攻打佢等；佢等愛因為種種个罪受責罰。

11「以色列原旦像一條乖个牛乸，隨時願意踏榖。𠊎就將牛軛放在牠又肥又靚个頸筋，來駛牠。𠊎喊猶大犁田，喊以色列耙地。

12𠊎講：『你等愛為自家開荒地，委公義，收成慈愛。𠊎係上主，這下就係你等尋求𠊎个時節，等𠊎來到，愛降下公義像落大雨。』

13總係你等毋聽，反轉委邪惡，收成罪孽，食花撩个惡果。

「因為你等倚靠自家个力量㧯大陣个軍隊，

14戰爭愛臨到人民，城堡全部會毀壞。該情況會像沙勒幔王毀壞伯‧阿比勒城共樣恁悽慘：做阿姆个㧯姖等个子女全部會被人㧹死。

15伯特利人啊！因為你等所犯个大罪，你等也愛受到共樣个災難。戰爭一發生，以色列个君王就會被人滅掉。」