以斯帖記 4 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

末底改向以斯帖求幫助

1 末底改知這兜事以後，非常痛心，扯裂衫，換等麻衫，將灰委在頭那頂，在城中行來行去，開聲大噭。

2佢來到王宮个門口，無入去，因為照規定著麻衫个人做毋得入王宮。

3王个通告無論傳到㖠省，該位个猶太人就盡悲傷。佢等禁食、開聲大噭；盡多人著等麻衫，睡在火灰肚。

4服事以斯帖王后个宮女㧯太監來將末底改做个事㧯姖講，姖非常憂愁，就送兜衫給末底改，希望佢將麻衫脫下來，總係末底改毋肯接受。

5以斯帖就喊王派來服事姖个太監哈他革來，愛佢到末底改該位去查看發生麼介事，係樣般發生个。

6哈他革到王宮門口个廣場去見末底改。

7末底改將所發生个事全部㧯佢講，又講，哈曼保證若係將猶太人滅掉，佢就會捐盡多錢來增加國庫个收入。

8末底改又交給佢一份在書珊公佈个通告，頂高有消滅猶太人个命令。末底改請佢將這份通告交給以斯帖，向以斯帖說明情形，喊姖入去向王懇求，為自家个同胞求情救命。

9哈他革轉去，將末底改个話㧯以斯帖講。

10以斯帖又派佢傳話給末底改講：

11「無分男女，無論係麼人，無得到王个召見就自家入去見王个，一定會判死刑。這係法律，全國上下，無論係王个顧問抑係逐省个人民全部知。只有一個情形例外；若係王向無得到召見个人伸出金杖，該人就毋使死。總係王已經有一隻月無召見𠊎了。」

12 末底改接到以斯帖个消息以後，

13就託人轉去，警告以斯帖講：「你毋好恅到你在王宮肚就會比其他个猶太人較安全。

14你在恁樣个時節恬恬毋講話，猶太人一定會對別位得到拯救，總係你㧯你个家族會滅亡。麼人知，你有好做王后敢毋係為到這個時機！」

15 以斯帖託人㧯末底改講：

16「你去召集書珊城所有个猶太人，為𠊎禁食祈禱，三日三夜毋食毋啉；𠊎㧯𠊎个宮女也愛恁樣。然後，𠊎正去見王；雖然這係違法个，𠊎還係愛去。若係死，死就算了。」

17 末底改離開以後，就照以斯帖要求佢个話去做。