耶利米書 26 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

耶利米受審判

1 約西亞个孻仔約雅敬開始做王統治猶大國个時，上主个話臨到耶利米。

2上主恁樣講：「你愛企在聖殿个庭院肚，將𠊎命令你講个話向該兜對猶大各城鎮前來禮拜个群眾宣佈，一句也做毋得漏掉。

3若係佢等肯聽，逐儕肯離開邪惡个道路，𠊎就會取消因為佢等个壞行為愛加給佢等个災難。

4-5你愛對佢等講：『上主恁樣講：你等毋遵行𠊎賜給你等个法律，毋聽從𠊎僕人 — 該兜先知个話，毋服從𠊎。𠊎一擺又一擺派𠊎个僕人 — 該兜先知向你等傳話，總係你等毋聽。

6若係你等繼續違背，𠊎就愛毀滅這聖殿，像𠊎以前毀滅示羅

共樣。世界各國全部會看這城做受咒詛个鑑戒。』」

7祭司、先知㧯大眾全部聽到耶利米在上主个聖殿肚講這兜話。

8耶利米一講煞，佢等就捉等佢，對佢講：「你真該死！

9你做麼介奉上主个名宣佈這聖殿會像示羅共樣毀滅，又講這城會成做無人住个荒埔？」所以大眾將耶利米包圍起來。

10有兜猶大國个官員聽到這件事，就對王宮上到上主个聖殿來，在「新門」開庭。

11該兜祭司㧯先知向官員㧯大眾告耶利米；佢等講：「這人應該判死刑，因為佢講預言攻擊這城；你等全部親耳聽到了。」

12 耶利米就對所有个官員㧯大眾講：「上主派𠊎來宣佈咒詛聖殿㧯這城个這兜話，你等全部聽到了。

13這下你等愛棄邪歸正，服從上主 — 你等个上帝。恁樣，佢就會取消本來愛加給你等个災難。

14論到𠊎，𠊎在你等手中！你等認為樣般對待𠊎正好，正公當，照恁樣對待𠊎就好了。

15毋過你等一定愛知：若係你等㓾𠊎，你等㧯這城，並城肚个人民，全部愛賠償㓾無罪人个血債，因為𠊎確實係上主派來个，愛將這一切个話傳到你等个耳公。」

16所以該兜官員㧯大眾對該兜祭司㧯先知講：「這個人無應該判死刑，因為佢係奉上主 — 𠊎等上帝个名向𠊎等講話。」

17接等，長老當中有幾儕企起來對大眾講：

18「頭擺，在希西家王統治猶大時，摩利沙人先知彌迦識向猶大人民宣佈，上主 — 萬軍个元帥恁樣講：

錫安會像田地被人犁揙轉來；

耶路撒冷會變做荒埔；

起聖殿个山會變做樹林 。

19 猶大王希西家㧯猶大人民敢有將彌迦處死呢？希西家敢毋係敬畏上主、到上主面前求佢施恩憐憫？所以上主改變心意，無將所宣佈个災難降在佢等身上。總係這下𠊎等卻想愛惹這個大災難，害死自家！」

20(該時，有一個基列‧耶琳人 — 示瑪雅个孻仔烏利亞；這人㧯耶利米共樣奉上主个名講預言，攻擊這城㧯這國家。

21約雅敬王㧯佢个士兵、官員，聽到烏利亞个話，就想愛㓾佢。烏利亞知這個陰謀，驚到趕緊走去埃及。

22約雅敬王派亞革波个孻仔以利拿單帶領一隊人逐到埃及去。

23佢等捉到烏利亞，將佢帶到約雅敬王面前。王用刀仔㓾死佢，將佢个身屍㧒在平民个墓地。)

24總係耶利米得到沙番个孻仔亞希甘个保護，無人將佢交給人民處死。