希伯來書 6 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1恁樣，𠊎等應該將關係基督个初步道理放在後背，向較成熟个信仰來進前。𠊎等毋使再立根基，像係對腐敗个行為悔改、信靠上帝、

2各樣个洗禮、按手禮、死人復活、永遠个審判等教訓。

3𠊎等愛向前行！上帝若准，𠊎等一定愛恁樣做。

4論到該兜離開正道个人，愛樣般使佢等重新悔改呢？佢等識得到上帝个光照，嘗過屬天恩賜个滋味，又㧯聖靈有份，

5也識體驗到上帝个話係何等个美好，又感受到末世个大能。

6你知無，後來佢等還係悖逆正道！這種个人無可能喊佢等回頭，重新悔改；因為佢等親手將上帝个孻仔再釘十字架，公然侮辱佢。

7田地常常吸收雨水，生出青菜，俾耕種个人得到利益，就承受上帝个賜福。

8總係，這田地若生出竻仔㧯蒺藜，還有麼介用呢？它就有受咒詛个危險，最尾被火燒掉。

9親愛个朋友啊，雖然𠊎等恁樣講，總係𠊎等還係相信你等有較好个行為，接近得救。

10上帝毋會恁無公當；佢毋會毋記得你等所做个工作㧯為到佢个名所表現个愛心，就係一直幫助其他个聖徒。

11𠊎等最大个心願就係：你等每一個人會熱心到底，使你等所盼望个一切得到實現。

12毋好懶尸，愛學該兜用信心㧯耐心來領受上帝應許个人。

上帝个應許係真實个

13上帝應許亞伯拉罕个時，佢有發過誓。因為無比佢較大个，佢就指自家个名來發誓。

14佢講：「𠊎一定愛大大賜福給你；𠊎一定愛使你多子多孫。」

15亞伯拉罕耐心等候，到尾就得到上帝所應許个。

16人發誓个時節，佢係指等比自家較大个來發誓；所以發誓成做一種个擔保，結束人㧯人中間个一切紛爭。

17上帝為到愛對該兜承接佢應許个人，強調佢个計劃永遠毋會改變，就在應許頂高加上發誓。

18上帝个應許㧯發誓攏總係毋會改變个，因為上帝毋會講花撩。所以，𠊎這兜拚等入到上帝保護之下个人得到當大个鼓勵，愛揪住放在𠊎等頭前个盼望。

19𠊎等有這盼望，就像生命个錨，又安全又穩當。這盼望通過天頂聖殿个布簾，入到底背个聖所。

20為到𠊎等，耶穌做先鋒，已經去該位；佢已經照麥基洗德个體制成做永遠个大祭司。