1上主恁樣講：「治理猶大个人 會堵到災難了，因為佢等悖逆𠊎。佢等毋跈𠊎，自家定計劃，㧯人簽違背𠊎旨意个條約，罪上加罪。
2佢等無求問𠊎就向埃及求幫助。佢等要求埃及个保護；佢等倚靠埃及王。
3總係埃及王無力量好保護佢等；埃及个保護到尾會帶來見笑，帶來羞辱。
4雖然猶大个使者已經到埃及个瑣安㧯哈內斯城；
5猶大人民將來會因為信賴一個靠毋得个國家來後悔。佢等無得到麼介好處，只有見笑、失望。」
6這係上帝所講有關猶大南方野獸个話：「猶大个使者在一個危險个地區旅行；該位有獅仔、毒蛇㧯會飛个火蛇 。佢等个驢仔㧯駱駝載滿貴重个禮物，愛去獻給一個無辦法幫助佢等个國家。
7埃及个幫助空空、無麼介路用。所以，𠊎㧯埃及安一個偏名，喊它『毋會挺動个拉哈伯
』。」毋順服个子民8上帝愛𠊎將佢子民个行動記錄在書上，刻在枋仔頂，使後代个人永遠記得佢等个邪惡。
9佢等係一群悖逆上主个人，好講花撩个子女，一直毋聽上主个教訓。
10佢等對先見講：「毋好看異象」，又對先知講：「毋好㧯𠊎等講應該做麼介；單單講𠊎等歡喜聽个話㧯虛假个事就好了。
11走開！毋好擋到𠊎等个路。𠊎等無愛聽有關以色列神聖个上帝。」
12總係以色列神聖个上帝恁樣講：「你等毋聽𠊎㧯你等講个話，反轉倚靠武力㧯詐欺。
13你等犯罪了。你等像一扇有裂縫个高牆，會忽然間橫下來。
14你等像打碎个缶仔，打到碎碎，無一析做得拿來裝火爐肚个火炭，抑係拿來舀水缸肚个水。」
15至高个上主 — 以色列神聖个上帝對佢个子民講：「轉來哪，安心信靠𠊎，你等就會得救；安靜心等候𠊎，你等就有力量。」總係你等毋願意。
16你等想愛騎快馬走俾敵人來逐。無毋著，你等一定愛逃走！你等恅到自家个馬仔走當遽，總係敵人个馬仔比你等走還較遽！
17就算你等有一千儕，聽到一個敵人咄一聲，你等就跋起來走；若有五個敵人喝喝咄咄，你等就全軍走淨淨。到尾，你等个軍隊就賸山頂孤單个一支旗篙！
18總係上主還在該位等，愛施恩給你等；佢愛興起，愛憐憫你等，因為上主係公正个上帝。等候佢个人全部樣般幸福啊！
上帝愛賜福給佢个子民19你等住在錫安、在耶路撒冷个人民啊，毋好再噭了。上主係慈愛个；你等向佢求幫助，佢就答應。
20主雖然給你等艱難準飯食，困苦準水啉，總係佢還係在旁邊教你等；你等定著會看到你等个教師。
21若係你等毋知愛行左片抑係右片，你等會聽到後背有聲音講：「路在這位，行這片來。」
22你等愛將包金抑係鑲銀个偶像做垃圾㧹掉，大聲喊：「閃較遠兜仔！」
23你等委種个時，上主會落雨，使種子生長，使你等豐收；你等个牛群會在盡闊个草原食草。
24為你等犁田个牛仔㧯驢仔會有最好个草料。
25你等个敵人被人㓾掉，佢等个城堡橫掉个時，你等所有个大山㧯細山會有泉水湧出，水多到變做河壩。
26月光會像日頭恁光；日頭个光會比以前加七倍，就像七日个光在一日做一下射出來！在上主包好佢子民个傷口、醫治佢等對佢受重傷該日，這兜事全部會發生。
上帝愛責罰亞述27看啊，上主个大能㧯榮耀 對遠方來了！佢譴到發火，火煙像雲柱。佢滿嘴憤怒；佢个話像烈火。
28佢歕氣像做大水，浸到人个頸筋；佢愛毀滅列國，像用篩仔篩它兜。佢用馬啣鐵放在它兜人民个嘴肚，使佢等行死路。
29總係你等會快樂唱歌，像朝聖者在過節个暗晡時恁樣。你等會心中歡喜，像朝聖者在吹笛聲中上去上主个山，到以色列个磐石該位去。
30上主愛使逐儕聽得到佢威嚴个聲音；佢愛用火、烏雲、冰雹、㧯大雨使人知佢个大發譴㧯責罰。
31亞述人聽到上主个聲音就愊愊掣；因為上主愛責罰佢等。
32上主逐擺攻打亞述人个時，佢个子民就打鼓彈琴來和。戰爭中上主愛親自攻擊亞述人。
33上主早就準備好一個所在 — 陀斐特，有大火愛燒亞述皇帝；該係一個闊闊个所在，頂高堆滿柴。上主愛歕一口氣，像硫磺火將該堆柴燒𤏸起來。
Who We AreWhat We EelieveWhat We Do
2025 by iamachristian.org,Inc All rights reserved.
