民數記 25 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

以色列人在批珥

1 以色列人在什亭安營个時，有人㧯該位个摩押婦人家行姦淫。

2-3該兜婦人家請佢等參加摩押人拜神明个祭典。以色列人食祭物，也拜批珥地方个神明巴力；所以，上主向佢等發譴。

4上主吩咐摩西講：「你愛照𠊎个話，在日頭下將這兜以色列領袖吊死，𠊎就毋會繼續向以色列人發譴。」

5摩西對以色列个審判官講：「你等逐儕愛將你等支族當中拜巴力該兜人㓾掉。」

6有一個以色列人在摩西㧯以色列全會眾面前，將一個米甸婦人家帶入佢个帳篷；該時，會眾堵好在聖帳篷門口悲傷哀噭。

7祭司亞倫个孫仔，以利亞撒个孻仔非尼哈看到，就企起來，離開會眾。佢拿一支槍，

8跈等該以色列人㧯該婦人家入去帳篷，用槍將佢兩儕對肚笥刺過去死掉。恁樣，該在以色列人當中流行个瘟仔就停止；

9總係因為發瘟死掉个已經有兩萬四千人。

10上主對摩西講：

11「因為祭司亞倫个孫仔，以利亞撒个孻仔非尼哈所做个事，𠊎就毋會繼續向以色列人發譴。佢對𠊎盡熱心，只有准人拜𠊎，毋准人拜別个神明，𠊎正無大發譴來毀滅佢等。

12你㧯佢講，𠊎愛㧯佢立平安个約。

13佢㧯佢个後代愛永遠做祭司；因為佢對𠊎盡熱心，也為以色列人贖罪。」

14該㧯米甸婦人家共下被人㓾死个以色列人安到心利，係撒路个孻仔，西緬支族一個家族个族長。

15該被人㓾死个米甸婦人家安到哥斯比；姖个阿爸蘇珥係米甸一個部落个領袖。

16上主命令摩西：

17「你愛攻打米甸人，將佢等消滅；

18因為佢等在批珥用詭計陷害你等，也係因為佢等个姊妹、該米甸領袖个妹仔哥斯比，在批珥發瘟當厲害个時被人刺死。」