1「天國可比這個故事：有一個葡萄園个主人打早出去，請工人去佢个葡萄園做事。
2佢同佢等講好，一日个工錢係一隻銀錢，就喊佢等入葡萄園去做事。
3朝晨頭九點鐘左右，佢又去市場，看到有兜人在該位閒閒企等，
4就對佢等講：『你等也入去葡萄園做事；𠊎會給你等公當个工錢。』
5佢等就去。後來，當晝十二點，㧯下晝頭三點鐘，佢又出去，照樣又請兜工人來。
6下晝頭會五點鐘，佢又出去，看到還有人閒閒企在該位，就問佢等講：『你等做麼介歸日閒閒企在這位？』
7佢等應講：『因為無人請𠊎等。』佢就對佢等講：『恁樣，你等也入去葡萄園做事。』
8「到臨暗仔，園主對工頭講：『喊工人全部來，發工錢給佢等，對最尾入來个先分，到最先入來个。』
9該兜五點鐘正來做事个，每一個人領到一隻銀錢。
10輪到該兜最先來做事个人領工錢，佢等恅到一定會得到較多，總係逐儕也係領到一隻銀錢。
11佢等領錢後，就埋怨主人，
12講：『該兜最尾入來个正做一點鐘个事，總係𠊎等歸日在𤊶𤊶个日頭下做到會死，你給佢等个卻同給𠊎等个平多！』
13園主應佢等中間个一儕講：『朋友，𠊎並無虧欠你。你㧯𠊎敢毋係講好，每日个工錢係一隻銀錢？
14拿你个工錢轉去！𠊎愛給該最尾來个，同給你个平多；
15敢講𠊎無權好用𠊎自家个錢嗎？因為𠊎對人大方，你就目赤赤係麼？』」
16耶穌結論講：「像恁樣，該兜在最背尾个會做頭前；在最頭前个會做背尾。」
耶穌第三擺預言自家个死㧯復活(馬可 10:32-34；路加 18:31-34)17耶穌去耶路撒冷个時，帶十二個學生到路堘，對佢等講：
18「看啊，𠊎等這下愛上耶路撒冷去；人子會被人交在祭司長㧯經學教師个手中。佢等會判佢死刑，
19然後將佢交給外邦人。佢等會㩢耍佢，鞭打佢，將佢釘十字架；總係，第三日佢會復活。」
阿姆个請求(馬可 10:35-45)20該時，西庇太个𡜵娘帶等兩個孻仔來見耶穌，跪下來，求佢一件事。
21耶穌問姖講：「你愛麼介？」
姖講：「求你答應，在你做王个時，俾𠊎這兩個孻仔一個坐在你个右片，一個坐在你个左片。」
22耶穌應講：「你等毋知自家所求个係麼介。𠊎一定愛啉个苦杯，你等有法度啉麼？」
佢等講：「𠊎等有法度！」
23耶穌講：「你等確實愛啉𠊎个苦杯；總係麼人坐在𠊎个左右，就毋係𠊎做得決定个。這兜座位，吾爸為麼人準備，就愛賜給麼人。」
24其他十個學生聽到這個事，就當閼佢兩兄弟。
25耶穌喊佢等全部到佢面前來，對佢等講：「你等知，外邦人个統治者有權管轄佢等，佢等个領袖也有權指揮佢等；
26總係，在你等當中做毋得恁樣。你等中間想愛做大人物个，就愛做你等个僕人；
27想愛做頭个，就愛做你等个奴僕；
28就像人子來，毋係愛被人服事，係來服事人，也愛為到救贖眾人來犧牲自家个生命。」
醫好兩個瞙目个(馬可 10:46-52；路加 18:35-43)29佢等離開耶利哥个時，一大群人跈等耶穌。
30有兩個瞙目个坐在路堘，一聽講係耶穌經過，就大聲喊講：「主啊 ，大衛个子孫啊，可憐𠊎等！」
31大家責備佢等，喊佢等毋好吵；總係佢等還較大聲喊講：「主啊，大衛个子孫啊，可憐𠊎等！」
32耶穌停下來，喊佢等過來，問講：「你等愛𠊎為你等做麼介？」
33佢等應講：「主啊，求你使𠊎等目珠看得到！」
34耶穌就憐憫佢等，摸佢等个目珠；佢等黏時看得到，就跈等耶穌。
Who We AreWhat We EelieveWhat We Do
2025 by iamachristian.org,Inc All rights reserved.
