1 希西家王一聽到佢等个報告，非常悲傷，就扯爛衫，著麻衫，入去上主个聖殿。
2佢派王宮總管以利亞敬、王室書記舍伯那、㧯該兜老輩个祭司，佢等全部著麻衫去見亞摩斯个孻仔先知以賽亞。
3佢等對以賽亞講：「希西家恁樣講：今晡日係國難个日仔；𠊎等全部受到侮辱㧯刑罰。𠊎等像難產个婦人家，無力好𫱔。
4亞述皇帝派佢个大將來侮辱永生个上帝。願上主 — 你个上帝聽到這兜褻瀆个話，責罰講這話个人。所以，請你為𠊎這兜賸到个人大聲祈禱。」
5 希西家王个官員來見以賽亞，
6以賽亞就對佢等講：「去㧯你等个主人恁樣講：『上主恁樣講：你等毋使因為聽到亞述人講侮辱𠊎个話就恁著驚。
7𠊎愛使亞述皇帝相信所聽到个風聲，催迫佢趕轉本國去，在該位被人㓾死。』」
亞述人再來威脅(列王紀下 19:8-19)8 亞述个大將聽講亞述皇帝已經徙營離開拉吉、去攻打附近个立拿城，佢就去該位見佢。
9亞述皇帝聽到風聲講，古實王特哈加帶埃及軍隊來攻打佢。所以皇帝就派兜使者帶信仔去㧯猶大王希西家講：
10「毋好聽你所倚靠个神騙你講：『耶路撒冷毋會交在亞述皇帝个手中。』
11你一定聽過，亞述歷代个皇帝係樣般徹底毀滅所有个國家！你恅到你還有救，係麼？
12𠊎个祖先識毀滅歌散、哈蘭、利色，消滅住在提拉撒个伊甸人；佢等个神明敢有救佢等麼？
13哈馬、亞珥拔、西法瓦音城、希拿、㧯以瓦該兜所在个王攏總在㖠位呢？」
14 希西家對使者手中將信仔接過來，讀了後就到聖殿去，在上主面前將信仔掀開。
15希西家向上主祈禱講：
16「在兩隻基路伯中央坐寶座个上主 — 萬軍个元帥、以色列个上帝啊，你係天下萬國獨一个上帝，天地係你創造个。
17上主啊，求你聽𠊎个祈禱！上主啊，求你看顧𠊎等！西拿基立派使者所講、侮辱你 — 永生上帝个話，你全部聽看仔！
18上主啊，亞述歷代个皇帝將列國變做荒地，這係事實。
19佢等還燒掉逐國个神明；其實它兜毋係真神，係人个手用樹仔、石頭做个偶像定定，所以就會被人除掉。
20上主 — 𠊎等个上帝啊，這下求你對亞述皇帝个手中拯救𠊎等；恁樣，世界逐國就會知只有你正係上主。」
以賽亞給王个信息(列王紀下 19:20-37)21 亞摩斯个孻仔以賽亞派人去㧯希西家講：「上主 — 以色列个上帝恁樣講：『有關亞述皇帝西拿基立个事，你緊求𠊎，你个祈禱𠊎聽到了。』
22上主論到西拿基立講：『鍚安城个子女在該位嘲謔你，藐視你；耶路撒冷个人民向你拂頭。
23你敢知，你大聲侮辱个係麼人？恁驕傲嘲謔个係麼人？看毋起个係麼人？係𠊎 — 以色列神聖个上帝！
24你派使者來罵𠊎，還誇口你个戰車征服高山，甚至佔領黎巴嫩最高个山頭。你誇口講，你在該位斬下最高个香柏樹㧯最好个松樹，又深入到樹林最深个所在。
25你誇口講，你識打井啉水，你个士兵將埃及个河壩全部踏燥。
26「『你敢毋識聽講𠊎古早以來就計劃這一切？𠊎這下在執行中。𠊎給你力量使該兜堅固个城堡成做荒埔、石堆。
27𠊎使住在該位个人失掉力量，驚到無葛無煞。佢等像野生个菜㧯屋頂个雜草，給燒燒个東風一吹就全部燥掉。
28「『你坐下來、你出去、你入來，𠊎全部知。𠊎也知你向𠊎發譴。
29𠊎早就聽到你盡驕傲，還向𠊎發譴。這下𠊎愛用鉤仔穿過你个鼻孔，拿馬啣鐵卡你个嘴；你對㖠條路來，就將你對該條路拉轉去。』
30「希西家啊，上主愛給你這個兆頭：今年㧯明年，你等只有野生个植物好食。到後年，你等就做得委種，收成；也做得種葡萄，食園中出產个葡萄。
31猶大國在患難後賸到个人還係會像植物向下釘根，向上結果。
32在耶路撒冷，在錫安山頂，患難後還係會有賸到个人住在該位，因為上主 — 萬軍个元帥愛熱心成就這事。
33「論到亞述皇帝，上主恁樣講：『佢無法度入這城，也無辦法射一枝箭入來。拿盾牌个士兵無可能行近這城，也無法度起土堆圍城。
34佢對㖠條路來，也會對該條路轉去；佢無可能入這城。這係𠊎 — 上主所宣佈个。
35為到𠊎自家个緣故，也為到吾僕人大衛个緣故，𠊎愛親自保護這城，拯救這城。』」
36結果，上主个天使入去亞述人个營中，㓾掉十八萬五千個士兵。第二日打早，有人䟘起來看到滿地係屍體。
37亞述皇帝西拿基立高不將就退兵轉尼尼微去。
38有一日，佢在廟肚拜佢个神尼斯洛个時，厥兩個孻仔亞得米勒㧯沙利色將佢㓾死，逃走到亞拉臘去。另外一個孻仔以撒哈頓承接佢做皇帝。
Who We AreWhat We EelieveWhat We Do
2025 by iamachristian.org,Inc All rights reserved.
