1耶穌指示十二學生个話講了後，就離開該地方，繼續去附近个各鄉鎮教訓人並傳福音。
2施洗約翰在監獄聽到關係基督个工作，就派厥學生去見耶穌，
3問佢講：「你就係約翰所講，該無幾久愛來个，抑係𠊎等還愛等別人啊？」
4耶穌應講：「你等轉去，將你等所聽到、所看到个，報告約翰，
5就係：瞙目个看到，跛腳个行路，發癩个得到淨浰，耳聾个聽到，死人返生，窮苦人聽到福音。
6無疑狐𠊎个人就有福氣！」
7 約翰个學生離開後，耶穌對眾人講起約翰，佢講：「你等頭擺去曠野尋約翰个時，想愛看麼介？看被風吹挺動个蘆竹係麼？
8你等到底出去做麼介哪？去看著靚衫个人係麼？總係，著靚衫个人住在王宮。
9恁樣，你等出去看麼介哪？係看先知麼？𠊎㧯你等講，無毋著，總係佢比先知還較大。
10佢就係聖經所講个人。
上帝講：
『看啊，𠊎愛差派𠊎个使者做你个先鋒；
佢愛為你開路。』」
11耶穌又講：「𠊎實在㧯你等講，世間無人比施洗約翰較偉大，總係在天國，最微細个也比佢較大！
12對施洗約翰傳道到今晡日，天國有受到暴力个攻擊 ，強暴个人想愛搶它。
13因為所有先知書㧯摩西个法律講預言到約翰為止；
14所以，你等若係肯領受佢等个預言，約翰就係該愛來个以利亞。
15有耳公好聽个人，就愛聽！
16「𠊎愛用麼介來比喻這世代个人呢？佢等像坐在市場个細人仔對同伴喊講：
17『𠊎等為你等歕婚禮个歌曲，
你等毋跳舞！
𠊎等唱喪禮个哀歌，
你等也毋噭！』
18 約翰來，毋食也毋啉，大家就講：『佢被鬼附身了！』
19人子來，也食也啉，大家又講：『佢係貪食好酒个人，專門同稅棍㧯壞人做朋友！』總係，真實个智慧係用它个結果來顯明个。」
毋信个城(路加 10:13-15)20該時，耶穌責備該兜看過佢行盡多神蹟个城市，因為該兜人無離開佢等个罪惡。
21佢講：「哥拉汛啊，你壞了！伯賽大啊，你慘了！𠊎在你等中間所行个神蹟，若係行在泰爾㧯西頓，該位个人早就著麻衫，委火灰在頭那頂來表示悔改囉！
22𠊎實在㧯你等講，在審判該日，泰爾㧯西頓所受个責罰會比你等所受个還較輕！
23若係你，迦百農啊，你想愛高高在上嗎？總係，你將來會跌落地獄去！因為，𠊎在你該位行過个神蹟若係行在所多瑪，它今晡日一定還在！
24𠊎實在㧯你等講，在審判該日，所多瑪所受个責罰會比你所受个還較輕！」
來就近𠊎(路加 10:21-22)25該時，耶穌講：「阿爸，天地个主啊，𠊎感謝你，因為你將這兜事囥等毋給聰明有學問个人知，反轉顯明給細人仔。
26阿爸啊，無毋著，這種安排係你所歡喜个旨意。
27「吾爸已經將一切賜給𠊎了！除了阿爸，無人識孻仔；除了孻仔㧯孻仔所愛啟示个人，也無人會識阿爸。
28「來啊，勞苦揹重擔个人啊，你等全部來就近𠊎，𠊎愛使你等得到休息。
29你等愛揹𠊎个軛來學𠊎，因為𠊎个心係溫柔又謙卑个；恁樣，你等个心神就會得到休息。
30因為𠊎个軛係好揹个；𠊎个擔係輕可个。」
Who We AreWhat We EelieveWhat We Do
2025 by iamachristian.org,Inc All rights reserved.
