撒母耳記上 10 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1 撒母耳拿一罌橄欖油，倒在掃羅頭那頂，唚佢講：「上主毋係膏油立你做佢个子民以色列个統治者嗎？你愛治理上主个子民，救佢等離開四周圍所有个仇敵。以下就係上主膏油立你做佢个子民統治者个證據 ：

2今晡日離開𠊎以後，你會在便雅憫地區个泄撒，偎近蕾潔个墳墓該位堵到兩個人。佢等會㧯你講：『你愛尋个驢仔已經尋到了。若爸無再愁驢仔，顛倒愁你，一直問人：𠊎為吾孻仔愛樣般正好？』

3你對該位再向前行，到他泊个聖樹該位，會堵到三個人；佢等愛去伯特利向上帝獻祭。其中一儕帶等三隻細山羊，另外一儕帶等三隻餅，第三儕帶等一皮袋酒。

4佢等會㧯你請安，給你兩隻餅；你愛收下來。

5「然後，你愛去基比亞，到上帝个山；該位有非利士人个駐防兵。你在入城个所在會堵到一群對山頂祭壇該位下來个先知；佢等面前有人打鼓、歕笛、彈豎琴㧯七弦琴；佢等又受感入神忘形講話。

6上主个靈愛強烈臨到你；你就會㧯佢等共下受感入神忘形講話，像變另外一個人。

7這兜兆頭發生个時，做你照上帝指示你个去做，因為上帝㧯你共下。

8你愛比𠊎先到吉甲；𠊎會在該位㧯你會合，又獻燒化祭㧯平安祭。你愛在該位等七日；𠊎到以後，會俾你知應該做个事。」

9 掃羅離開撒母耳个時，上帝使佢个心變做新个。撒母耳㧯佢講个逐個兆頭，該日全部實現了。

10掃羅㧯佢个僕人到基比亞个時，一群先知迎接佢。上帝个靈強烈臨到佢，佢就㧯該群先知共下受感入神忘形講話。

11以前認識掃羅个人看到佢恁樣，大家互相問講：「基士个孻仔樣會恁樣？掃羅敢也成做先知嗎？」

12該地方有一個人講：「恁樣，其他个人呢？佢等个阿爸係先知麼？」這就係「掃羅敢也成做先知嗎？」這句俗語个來源。

13掃羅在該位受感入神忘形講話以後，就去山頂祭壇該位。

14 掃羅个阿叔看到佢㧯僕人，就問佢等：「你等到㖠位去？」

掃羅講：「𠊎等去尋驢仔啊！尋毋到，𠊎等就去見撒母耳。」

15 掃羅个阿叔問：「撒母耳㧯你等講麼介？」

16 掃羅應講：「佢㧯𠊎等講驢仔已經尋到了。」總係掃羅無㧯厥叔提起撒母耳所講立王个話。

17 撒母耳召集以色列人去米斯巴，到上主个面前去，

18對佢等講：「上主 — 以色列个上帝講，佢帶領你等出埃及，救你等脫離埃及人㧯所有欺負你等个國家。

19佢係你等个上帝，係救你等脫離所有災難㧯壓制个上帝。總係今晡日，你等拒絕佢，要求𠊎為你等立一個王。這下你等愛照支族㧯宗族个順序集合在上主面前。」

20所以，撒母耳喊以色列逐支族行前來拈鬮，就拈出便雅憫支族。

21撒母耳喊便雅憫支族个逐家族行前來，拈出瑪特利家族，然後拈出基士个孻仔掃羅。眾人愛尋掃羅，總係尋佢毋到。

22佢等求問上主：「這儕人有來麼？」

上主應講：「掃羅在該片，囥在包袱堆後背。」

23有人走去拉掃羅出來，帶佢到眾人當中；佢比所有个人高加一隻頭。

24撒母耳對眾人講：「你等看，這就係上主揀選个人！𠊎等當中無一個人㧯佢比抑得。」

眾人大聲喊：「願王萬歲！」

25 撒母耳向眾人說明王个責任㧯權利，又將這兜規定寫在書卷上，放在上主面前，然後喊逐儕轉屋下去。

26掃羅就轉基比亞屋下去；有一群被上帝感動个勇士跈掃羅共下去。

27總係有兜鱸鰻仔講：「這種腳數敢有辦法救𠊎等？」佢等看毋起掃羅，也無送禮物給佢；掃羅卻毋搭佢等。