詩篇 101 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

王个應許 大衛个詩。

1𠊎愛歌頌你个慈愛㧯公義；

上主啊，𠊎愛唱歌來頌讚你！

2𠊎愛細膩行人生完全个路。

你愛到幾時正來𠊎這位呢？

𠊎在王宮底背愛過純潔个生活；

3𠊎絕對毋俾邪惡發生在𠊎眼前。

𠊎盡惱悖逆上帝个人所做个；

𠊎絕對毋俾佢等个行為遰到。

4𠊎毋俾𠊎个心肝歪走 ；

𠊎絕對毋搭邪惡个事 。

5𠊎愛消滅暗中譭謗朋友个人；

𠊎不准有麼人驕傲、自高自大。

6𠊎愛看顧對上帝忠心个人，

𠊎愛俾佢等住在𠊎个王宮；

行為完全个正做得服事𠊎。

7詭詐个人做毋得住在𠊎个王宮；

假好个人做毋得企在𠊎个面前。

8𠊎逐日天一光愛消滅國內所有个壞人；

𠊎愛將一切作惡个人對上主个城剪除。