詩篇 60 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

堵到失敗向上帝哀求 大衛在那海螺㧯瑣巴同亞蘭人相㓾，約押轉頭，在鹽谷㓾死一萬兩千以東人，該時大衛刻這首詩 ，來教人。交給聖歌隊長，調用做證个百合花。

1上帝啊，你識拒絕𠊎等，破壞𠊎等；

你識對𠊎等發譴，這下求你復興𠊎等！

2你使大地顫到盡厲害，使它裂開；

這下，求你修補，因為它會碎掉了！

3你使你个子民堵到艱難困苦；

你使𠊎等像啉釅酒橫來橫去。

4你識為敬畏你个人插一支旗仔，

俾佢等聚集在旗下，來閃開弓箭。

5為到愛使你所惜个子民得救，

求你應𠊎等，用大能拯救𠊎等。

6上帝對佢个聖所宣告講 ：

「𠊎愛打贏，𠊎愛分裂示劍，

將疏割山壢分給𠊎个子民。

7 基列係屬𠊎个，

瑪拿西也屬𠊎；

以法蓮係𠊎个頭盔；

猶大就係𠊎个權杖。

8 摩押係𠊎个洗腳盆；

以東就係𠊎个地盤；

非利士係𠊎个手下敗將。」

9麼人能帶𠊎打入這堅固个城？

麼人能帶領𠊎去到以東个地？

10上帝啊，你正經將𠊎等㧒掉了係麼？

你毋同𠊎等个軍隊共下出戰係麼？

11求你幫助𠊎等攻擊敵人，

因為人个幫助全無路用。

12有上帝共下，𠊎等就會勝利；

佢一定會踐踏𠊎等个仇敵。