民數記 33 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

對埃及到摩押个行程

1以下係以色列人照軍隊，在摩西㧯亞倫帶領之下離開埃及以後安營个地方。

2摩西遵照上主个命令將逐擺安營个地名記錄下來。

3 以色列人在正月十五，就係第一個𨃟過節个第二日，離開埃及。佢等因為有上主个保護，在埃及眾人目瞋瞋之下，勇敢無驚離開蘭塞城；

4該時埃及人當在埋葬佢該兜被上主㓾死个長子。上主做這事，顯明佢个權力贏過埃及个神明。

5 以色列人離開蘭塞，先在疏割安營，

6然後在曠野堘个以倘安營。

7對該位佢等轉到巴力‧洗分東片个比‧哈希錄，在密奪附近安營。

8佢等離開比‧哈希錄以後，經過紅海到曠野，又在以倘曠野行三日个路，然後在瑪拉安營。

9佢等對該位到以琳安營，因為以琳有十二口泉水，七十頭棕樹。

10離開以琳以後，佢等在紅海附近安營。

11接下來佢等到汛曠野，

12然後到脫加，

13去到亞錄。

14接下去佢等去到利非訂；在該位佢等無水好啉。

15-37對利非訂到何珥山，佢等先後在以下各地安營：西奈曠野、基博羅‧哈他瓦 (意思係「貪慾个墳墓」)、哈洗錄、利提瑪、臨門‧帕烈、立拿、勒撒、基希拉他、沙斐山、哈拉大、瑪吉希錄、他哈、他拉、密加、哈摩拿、摩西錄、比尼‧亞干、曷‧哈及甲、約巴他、阿博拿、以旬‧迦別、尋曠野 (就係加低斯)、何珥山、以東地个邊界。

38-39 以色列人離開埃及後个第四十年五月初一，祭司亞倫遵照上主个命令上何珥山，就死在該位。亞倫死个時係一百二十三歲。

40 迦南南方个亞拉得王聽講以色列人來了。

41-49對何珥山到摩押平原，以色列人先後在以下各地安營：撒摩拿、普嫩、阿伯、摩押境內个亞巴琳荒地、底本‧迦得、亞門‧低比拉太音、尼波山附近个亞巴琳山、約旦河滣耶利哥對面个摩押平原、伯‧耶施末㧯亞伯‧什亭中間个地方。

過約旦河前个指示

50在約旦河滣耶利哥對面个摩押平原，上主吩咐摩西

51將以下个指示㧯以色列人講：「你等過約旦河，進入迦南地以後，

52一定愛將當地个人民全部逐出去，將佢等所有雕刻个抑係鑄造个偶像打碎，毀壞所有敬拜个地方。

53你等愛佔領該地，在該位住，因為𠊎將該地賜給你等做產業。

54你等愛用抽籤个方法將土地分給各支族各宗族。愛將大垤个土地分給人較多个宗族，細垤个土地分給人較少个宗族。

55若係你等毋將當地个人民逐走，該兜留下个人會成做你等个災難，親像你等目珠肚个竻、脇下个竻藪；佢等反轉會在你等所住个土地傷害你等。

56若係你等毋將佢等逐走，𠊎愛消滅你等，像𠊎照計劃消滅佢等一樣。」