1第二日打早，祭司長趕緊同長老、經學教師，㧯議會全體參詳，議定計劃。佢等將耶穌䌈起來，解送，交給彼拉多。
2彼拉多問佢講：「你係猶太人个王麼？」
耶穌應講：「這係你講个。」
3祭司長告耶穌盡多事情，
4所以彼拉多又問耶穌講：「你看，佢等告你恁多罪名，你無愛回答嗎？」
5耶穌還係毋講一句話；彼拉多感覺奇怪。
耶穌被人判死刑(馬太 27:15-26；路加 23:13-25；約翰 18:39–19:16)6逐年𨃟過節，彼拉多照眾人个要求放一個囚犯。
7堵好有一個人名安到巴拉巴，佢同該兜在暴亂中㓾人个叛徒關共下。
8大眾聚集，要求彼拉多照慣例為佢等辦這件事个時節，
9彼拉多問佢等講：「你等愛𠊎為你等放猶太人个王係麼？」
10其實彼拉多明明知，祭司長係因為嫉妒正將耶穌交給佢个。
11總係祭司長煽動眾人，要求彼拉多為佢等放巴拉巴。
12彼拉多又問眾人講：「恁樣，你等稱做猶太人个王个，𠊎愛樣般處理佢哪？」
13佢等大聲喊講：「將佢釘十字架！」
14 彼拉多問講：「佢到底做麼介壞事？」
佢等還較大聲喊講：「將佢釘十字架！」
15 彼拉多為到愛得到眾人个歡喜，就放巴拉巴給佢等，又命令將耶穌鞭打，然後交給人去釘十字架。
兵仔㩢耍耶穌(馬太 27:27-31；約翰 19:2-3)16兵仔將耶穌帶入總督府个庭院肚，又喊全隊集合。
17佢等㧯耶穌著一領紫色个長袍，又用竻仔編一頂冕旒，㧯佢戴等，
18然後對佢行禮講：「猶太人个王萬歲！」
19佢等又用藤條緊打佢个頭那，用口潾呸佢，跪落去拜佢。
20㩢耍煞，佢等將佢个紫色長袍脫下來，㧯佢著自家个衫，然後帶佢出去釘十字架。
耶穌被人釘十字架(馬太 27:32-44；路加 23:26-43；約翰 19:17-27)21在路上，佢等堵到一個人，名安到西門，堵好對鄉下入城來，佢等強迫佢代耶穌擎十字架。 (西門係古利奈人，係亞歷山大㧯魯孚个阿爸。)
22佢等將耶穌帶到一個地方，安到各各他，意思就係「頭那殼个山頭」。
23在該位，佢等拿摻沒藥个酒給耶穌啉，總係耶穌毋啉。
24然後佢等將耶穌釘在十字架頂，又抽籤仔來分佢个衫。
25朝晨頭九點鐘个時，佢等將耶穌釘十字架。
26有一垤牌仔寫等佢个罪名講：「猶太人个王。」
27佢等又將兩個強盜同耶穌共下釘十字架，一個在佢个右片，一個在佢个左片。
29對該位經過个人侮辱耶穌，搖頭講：「嗐，你這愛拆聖殿，三日內將它重建起來个！
30這下，救你自家，對十字架頂下來啊！」
31祭司長㧯經學教師也共樣恥笑佢，彼此講：「佢救了別人，卻無法度救自家！
32基督，以色列个王啊，這下對十字架頂下來給𠊎等看，𠊎等就相信！」
同耶穌共下釘十字架个人也恁樣嘲謔佢。
耶穌个死(馬太 27:45-56；路加 23:44-49；約翰 19:28-30)33當晝个時，大地烏暗，約有三點鐘久。
34到下晝三點鐘个時，耶穌大聲喊講：「以羅伊！以羅伊！拉馬撒巴各大尼？」意思係講：「𠊎个上帝，𠊎个上帝，你做麼介放掉𠊎？」
35塍頭企等个人，有兜聽到就講：「聽啊，佢喊以利亞！」
36有一個人走過去，拿一垤海綿浸酸葡萄酒，然後䌈在藤條頂，拿給佢啉，講：「等一下仔，𠊎等看以利亞會來救佢下來無！」
37耶穌大喊一聲，就斷氣死掉。
38掛在聖殿肚个布簾，對頂高到底下裂做兩析。
39企在十字架前个一個軍官，看到耶穌大聲喊㧯 死个情形，就講：「這人實在係上帝个孻仔！」
40還有兜婦人家遠遠企等看；其中有抹大拉个馬利亞，又有細雅各㧯約瑟个阿姆馬利亞，同撒羅米。
41耶穌在加利利个時，姖等就跈等佢，也服事佢。還有其他好多婦人家係同耶穌共下來耶路撒冷个。
耶穌个安葬(馬太 27:57-61；路加 23:50-56；約翰 19:38-42)42-43臨暗仔，亞利馬太人約瑟來到；佢係一個受人尊重个議員，也一直盼望上帝國个實現。該日係預備日，就係安息日个前一日。約瑟大膽去見彼拉多，要求收殮耶穌个遺體。
44彼拉多聽到耶穌已經死掉，感覺盡奇怪。佢喊軍官來，問佢耶穌係毋係死掉盡久。
45對軍官了解實情後，彼拉多就將耶穌个遺體交給約瑟。
46約瑟買了麻紗，將耶穌个遺體取下來，用麻紗包好，放在石壁鑿成个墳墓底背，又將一垤大石頭碾過來，塞等門口。
47抹大拉个馬利亞㧯約瑟个阿姆馬利亞有看到安葬耶穌个所在。
Who We AreWhat We EelieveWhat We Do
2025 by iamachristian.org,Inc All rights reserved.
