民數記 1 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

以色列个第一擺人口調查

1 以色列人離開埃及後个第二年二月初一，上主在西奈曠野，在佢个聖帳篷底背對摩西講：

2-3「你㧯亞倫愛調查以色列全會眾个人口，愛一宗族一宗族、一家族一家族調查，將二十歲以上會相㓾个男人一儕一儕，照佢等个軍隊列出名單來。

4你等愛對逐支族尋一個族長來幫助你等。」

5-16以下係逐支族為這項工作所選出來个領袖：

呂便支族 — 示丟珥个孻仔以利蓿；

西緬支族 — 蘇利沙代个孻仔示路蜜；

猶大支族 — 亞米拿達个孻仔拿順；

以薩迦支族 — 蘇押个孻仔拿坦業；

西布倫支族 — 希倫个孻仔以利押；

約瑟个子孫兩個支族：

以法蓮支族 — 亞米忽个孻仔以利沙瑪；

瑪拿西支族 — 比大蓿个孻仔迦瑪列；

便雅憫支族 — 基多尼个孻仔亞比但；

但支族 — 亞米沙代个孻仔亞希以謝；

亞設支族 — 俄蘭个孻仔帕結；

迦得支族 — 丟珥个孻仔以利雅薩；

拿弗他利支族 — 以南个孻仔亞希拉。

以上个人係對會眾選出來个，逐儕做本支族个族長，全部係以色列軍隊个領袖。

17 摩西㧯亞倫得到這十二儕个幫助，

18就在二月初一聚集全會眾，照宗族、家族个順序登記全部人民。所有二十歲以上个男人一儕一儕全部登記下來算人數，

19照上主所命令个。恁樣，摩西在西奈曠野登記全部人民。

20-43二十歲以上會相㓾个男人，照宗族、家族个順序，一儕一儕全部登記下來算人數；以色列个長子呂便該一支族排頭前。逐支族个總人數記在下背：

呂便支族 — 四萬六千五百人；

西緬支族 — 五萬九千三百人；

迦得支族 — 四萬五千六百五十人；

猶大支族 — 七萬四千六百人；

以薩迦支族 — 五萬四千四百人；

西布倫支族 — 五萬七千四百人；

約瑟个子孫兩個支族：

以法蓮支族 — 四萬零五百人；

瑪拿西支族 — 三萬兩千兩百人；

便雅憫支族 — 三萬五千四百人；

但支族 — 六萬兩千七百人；

亞設支族 — 四萬一千五百人；

拿弗他利支族 — 五萬三千四百人。

44以上个男人全部係摩西㧯亞倫並代表以色列十二支族个族長登記下來个。

45以色列全會眾二十歲以上會相㓾个男人，全部係照家族登記下來算人數个。

46總共人數就係六十萬三千五百五十人。

47 利未人無㧯其他支族共下登記，

48因為上主識對摩西講：

49「你調查會相㓾个人數个時，毋好包含利未支族。

50你愛派利未人管理約櫃个聖帳篷㧯其中个用品；佢等愛搬運這兜東西，在聖帳篷底背事奉。佢等个帳篷愛搭在聖帳篷个四周圍。

51你等逐擺徙營个時，利未人愛拆下聖帳篷，在新个營地重新搭起來。所有其他个人若係接近聖帳篷，一定愛處死刑。

52「其他个以色列人愛安營，逐儕在佢所屬个大旗下，照軍隊來安排。

53總係利未人愛在約櫃个聖帳篷个四周圍安營守衛，免得有人行近聖帳篷，惹𠊎責罰以色列會眾。」

54所有上主命令摩西个話，以色列人就照恁樣去做。