1 約西亞个孻仔約雅敬做猶大王个第四年，上主對耶利米講：
2「你拿書卷來，將𠊎㧯你講有關以色列、猶大㧯各國个逐項事全部記錄下來。對約西亞王个時代到今晡日，𠊎㧯你講過个話，你全部愛寫下來。
3猶大人民一聽到𠊎愛向佢等降災難，可能大家會離開罪惡个道路。恁樣𠊎就赦免佢等个罪惡㧯過犯。」
4所以，耶利米請尼利亞个孻仔巴錄來，將上主㧯佢講過个話全部講給巴錄聽；巴錄就記錄在書卷底背。
5耶利米吩咐巴錄講：「𠊎被人禁止，無辦法入上主个聖殿去。
6所以你愛在禁食个日仔到聖殿去，向眾人讀你記錄在這書卷底背个話，俾佢等聽上主向𠊎講過个話。你愛大聲讀給該兜對逐城市來个猶大人民全部聽到。
7可能佢等會向上主祈求，大家就離開佢等罪惡个道路，因為上主所講對付這兜人民愛發出个怒氣係非常个厲害。」
8尼利亞个孻仔巴錄就照先知耶利米个一切指示，在聖殿中對書卷底背讀上主个話。
9這事發生在約西亞个孻仔約雅敬做猶大王个第五年九月；該時所有耶路撒冷人㧯對猶大逐城市來个人在上主面前宣佈禁食。
10巴錄當眾讀耶利米講過、記錄在書卷底背个話；該時佢係在聖殿底背、宮廷書記沙番
个孻仔基瑪利雅个房間肚。這房間在上層个庭院，聖殿「新門」个入口附近。讀書卷給官員聽11 沙番个孫仔，基瑪利雅个孻仔米該亞聽到書卷底背所有上主个話，
12佢就下到宮廷書記个房間去。佢看到所有个官員全部在該位坐等：有宮廷書記以利沙瑪、示瑪雅个孻仔第來雅、亞革波个孻仔以利拿單、沙番个孻仔基瑪利雅、哈拿尼雅个孻仔西底家，其他官員也全部在場。
13然後，米該亞將所聽到、就係巴錄當眾讀个話全部向佢等報告。
14所以佢等派古示个曾孫，示利米雅个孫仔，尼探雅个孻仔猶底到巴錄該位講：「你當眾讀个，該書卷帶過來。」尼利亞个孻仔巴錄就將該書卷帶到佢等該位去。
15佢等對佢講：「請坐，讀給𠊎等聽！」巴錄就讀給佢等聽。
16佢等聽了，逐儕就盡著驚，你看𠊎，𠊎看你，對巴錄講：「𠊎等一定愛將這兜話㧯國王報告。」
17佢等查問佢：「㧯𠊎等講，你樣會寫這兜話？係耶利米親嘴講个麼？」
18 巴錄應講：「全部係耶利米親嘴㧯𠊎講个；𠊎用墨水記錄在這書卷面頂。」
19該兜官員㧯巴錄講：「你㧯耶利米兩儕愛遽遽囥起來；毋好俾人知你等囥在㖠位。」
王將書卷燒掉20佢等將該書卷留在宮廷書記以利沙瑪个房間，然後到王宮去，將這件事全部向王報告。
21王派猶底去拿該書卷。猶底就到宮廷書記以利沙瑪个房間去拿轉來，讀給王㧯王左右个官員聽。
22該時係九月，王在佢个冬宮肚，坐在火爐前焙火。
23猶底讀三四段，王就用祕書个刀仔將該書卷割到爛爛，一垤一垤㧒落火爐肚，一直到歸卷書在火爐肚燒淨淨。
24王㧯佢个官員聽到書卷底背記錄个話，無半儕驚，也無扯爛衫來表示傷心。
25雖然以利拿單、第來雅㧯基瑪利雅求王毋好燒該書卷，王毋聽佢等，
26反轉命令王子耶拉篾㧯亞斯烈个孻仔西萊雅、並亞伯疊个孻仔示利米雅來捉祕書巴錄㧯先知耶利米。總係上主已經將佢等囥起來。
耶利米重新寫書卷27 約雅敬王將耶利米親嘴所講、巴錄所記錄該書卷燒掉以後，上主㧯耶利米講：
28「你將猶大王約雅敬先前燒掉該書卷底背一切个話，重新寫在另外一卷書底背。
29論到猶大王約雅敬，你愛對佢講：『上主恁樣講：你燒掉該書卷，又查問耶利米做麼介在書卷底背寫講巴比倫王一定會來毀壞這地、消滅人民㧯頭牲。
30所以，約雅敬王啊，𠊎 — 上主㧯你講：你毋會有後代好承接大衛个王位。你个身屍愛豁在野外，日時頭被日頭㸐，暗晡時被寒霜凍。
31因為你等犯个一切罪過，𠊎愛責罰你、你个子孫㧯你个官員。你㧯耶路撒冷並猶大人民全部毋聽𠊎个警告，所以𠊎愛照𠊎所講个降大災難在你等身上。』」
32所以，耶利米再拿書卷給尼利亞个孻仔祕書巴錄；佢就將耶利米親嘴所講个話全部記錄下來。佢將猶大王約雅敬燒掉該書卷底背所有个話重新寫下來，並加盡多相像个話。
Who We AreWhat We EelieveWhat We Do
2025 by iamachristian.org,Inc All rights reserved.
