1這所有个𠊎全部看過了；
𠊎也全部聽過，全部明白。
2你等知个，𠊎也知；
𠊎毋會較輸你等。
3𠊎愛㧯全能者講，毋㧯你等拗；
𠊎愛㧯上帝來辯論𠊎个案情。
4你等自家造花撩；
你等係無用个醫生。
5若係你等願意恬恬莫講話，
你等就算做盡有智慧个人！
6這下請聽𠊎个辯論，
愛注意聽𠊎个申訴。
7你等做麼介為上帝講不義个話？
你等樣般愛為佢講詭詐个話呢？
8你等斷真愛看上帝个情面嗎？
你等愛去法院為佢辯論係麼？
9若係上帝調查你等，你等正經有恁好麼？
你等恅到做得騙上帝，像騙人恁樣係麼？
10你等若暗中對人偏心，
佢也一定會責備你等。
11上帝个威嚴敢毋會使你等大著驚？
佢恁得人驚敢毋會使你等愊愊掣？
12你等所講个格言像塵灰恁無用；
你等辯論个理由像湳泥恁軟弱。
13你等恬恬，由在𠊎講話；
後果樣般，𠊎自家承擔。
14樣般好哪？𠊎甘願冒危險 ，
𠊎準備拿𠊎个生命來拚！
15𠊎已經無希望，就算上帝愛㓾𠊎又樣般？
𠊎一定愛在佢面前為自家个所行來辯論。
16撿採𠊎个勇氣會救到𠊎，
因為壞人毋敢面對上帝。
17這下請注意聽𠊎个話，
恬恬聽𠊎為自家辯論。
18𠊎已經準備好𠊎个案件，
𠊎知會判無罪。
19上帝啊，你正經愛告𠊎係麼？
斷真恁樣，𠊎就恬恬，甘願死。
20除非你同意𠊎兩項要求，
𠊎就毋對你面前囥起來：
21求你莫責罰𠊎；
求你毋好嚇𠊎。
22上帝啊，你告𠊎，𠊎來回答；
抑係𠊎告你，你來回答。
23𠊎到底犯到麼介罪？做麼介壞事？
求你俾𠊎知𠊎个過犯，𠊎个罪名。
24你做麼介揞面毋搭𠊎？
你做麼介看𠊎做敵人？
25𠊎像被風吹个落葉，你還愛嚇𠊎係麼？
𠊎像燥掉个禾稈碎，你還愛追𠊎係麼？
26你記錄𠊎个罪狀嚴嚴指責𠊎，
愛𠊎擔當後生時所犯个過失。
27你用鐵鍊鎖等𠊎个腳，
監視𠊎所行每一步路，
甚至檢查𠊎个腳跡印。
28你使𠊎像糜掉个東西，
像一領被蟲咬爛个衫。
Who We AreWhat We EelieveWhat We Do
2025 by iamachristian.org,Inc All rights reserved.
