詩篇 32 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

認罪㧯赦免 大衛个教訓詩。

1過犯得到原諒、罪惡得到赦免个人，

佢係樣般有福氣啊！

2心中無詭詐、無被上主定罪个，

這人實在有福氣噢！

3𠊎个嘴合等，毋肯認罪个時節，

因為歸日哀傷，致到骨頭枯燥。

4上主啊，你日夜責罰𠊎；

𠊎个氣力消散，像水氣在大熱天燥掉一樣。

5然後，𠊎對你承認𠊎个罪，

無再將自家个過失囥等。

𠊎決定：「𠊎愛對上主承認𠊎个過犯」；

你就赦免𠊎所有个罪。

6所以，一切敬虔个人，

應當在尋得到你个時 對你祈求；

災難像做大水个時節，

佢正毋會浸到。

7你係𠊎个避難所；

你一定會救𠊎脫離災難。

你用得救歡喜个歌聲四面圍等𠊎。

8上主講：「𠊎愛教你，

指示你應當行个路；

𠊎愛勸話你，看顧你。

9莫戇到像馬抑係像騾仔恁樣，

愛用馬啣鐵㧯嘴籠仔約束牠，正肯順服。」

10邪惡人一定會堵到種種个痛苦；

總係，信靠上主个人有不變个慈愛四面圍等佢。

11義人啊，愛因為上主所做个來歡喜快樂；

心肝正直个人啊，你等全部愛大聲歡呼。