1𠊎等被人捉去个第二十五年，也就係耶路撒冷被人佔領个第十四年正月初十，上主个大能臨到𠊎身上，佢將𠊎帶走。
2在異象中，上帝帶𠊎到以色列地，將𠊎放在一座高山頂。𠊎看到南片當像起有一座城。
3佢帶𠊎到該位；𠊎看到一個人就像銅恁樣發光，手中拿等麻索㧯測量用个尺，企在門口。
4該人對𠊎講：「人子啊，你愛詳細看，側耳聽，專心注意𠊎給你个指示，因為這係上帝帶你到這位來个目的。你愛將你所看到个一切㧯以色列人講。」
東門5𠊎看到个係聖殿，四面有圍牆。該人手中拿等一支三公尺長測量用个尺，在該位量圍牆。圍牆高三公尺，賁三公尺。
6接等，佢到向東个門，上門段，在門段頂量外玄關，有三公尺深。
7過玄關有走廊；走廊兩片各有三間守衛室。逐間守衛室全部係三公尺四方；房間全部有壁隔等，相隔兩公尺半。通過這兜守衛室，另外有三公尺深个內玄關，透到一間門廊；這門廊面對等聖殿。
8-9佢量這門廊，有四公尺深。這門廊係在走廊个尾節，在偎近聖殿該頭；走廊兩片壁个柱𣎴賁一公尺。
10走廊兩片各有守衛室三間，大細共樣，隔間壁个柱𣎴大細也共樣。
11該人量大門个入口，闊五公尺，走廊闊六公尺半。
12逐個守衛室頭前全部有矮牆：高五十公分，賁五十公分。房間全部係三公尺四方。
13佢又量兩間相對个守衛室外壁㧯外壁當中个距離，有十二公尺半。
14走廊盡尾个門廊透到外院；佢量這門廊，闊十公尺 。
15走廊，對大門口這片到門廊个後壁，長二十五公尺。
16逐間守衛室个外壁全部有細窗門，壁个柱𣎴㧯壁个柱𣎴中間也有細窗門，門廊周圍也全部有細窗門。走廊兩片壁个柱𣎴全部有雕刻棕樹。
外院17該人帶𠊎入到外院。外院周圍有三十間房間憑等外壁，房間頭前有鋪石頭个路，
18路在逐隻門个兩片，路闊㧯門平長。外院比內院較低。
19內院有一隻門，比外院个門較高；這門係對外院通內院用个。該人量這兩隻門个距離，長五十公尺 。
北門20該人量外院向北該隻門。
21走廊兩片各有三間守衛室。兩片守衛室、壁个柱𣎴、並門廊个尺寸㧯東門个共樣。走廊長二十五公尺，闊十二公尺半。
22門廊、窗門、並雕刻有棕樹个壁个柱𣎴全部㧯東門共樣。走廊个門口有七隻段仔上北門，走廊个盡尾有一隻門廊向外院。
23這門隔等外院，對面有另外一隻門，通到內院，北片㧯東片共樣。該人量這兩隻門个距離，長五十公尺。
南門24該人帶𠊎到南片；𠊎等看到向南个門。佢量這門；守衛室、壁个柱𣎴、並門廊个尺寸㧯其他个門共樣。
25這門㧯門廊四周圍全部有細窗門，㧯其他个門个窗門共樣。走廊長二十五公尺，闊十二公尺半。
26走廊个門口有七隻段仔上南門，走廊个盡尾有一隻門廊向外院。兩片有壁个柱𣎴，柱𣎴頂雕刻有棕樹。
27這門對等透到內院个南門。該人量這兩隻南門之間个距離，長五十公尺。
內院个南門28該人帶𠊎對南門入內院。佢量內院个南門，大細㧯外院其他个門共樣。
29-30這位也有守衛室、門廊、並壁个柱𣎴，大細全部㧯其他个門共樣。門㧯門廊四圍全部有細窗門。走廊長二十五公尺，闊十二公尺半。
31門廊向等外院；走廊兩片个壁頂全部雕刻有棕樹。上這門有八段个石段。
內院个東門32該人帶𠊎到內院个東門。佢量內院个東門，大細㧯其他个共樣。
33這位也有守衛室、門廊、並壁个柱𣎴，大細全部㧯其他个門共樣。門㧯門廊四圍全部有細窗門。走廊長二十五公尺，闊十二公尺半。
34門廊向等外院；走廊兩片个壁頂全部雕刻有棕樹。上這門有八段个石段。
內院个北門35該人帶𠊎到北門。佢量內院个北門，大細㧯其他个共樣。
36這位也有守衛室、壁个柱𣎴，㧯門廊。門㧯門廊四周圍全部有細窗門。走廊長二十五公尺，闊十二公尺半。
37門廊向等外院；走廊兩片个壁頂雕刻有棕樹。上這門有八段个石段。
橫屋38外院有一間有門个橫屋，㧯透到內院个北門个門廊連接，祭司會在該位洗燒化祭个頭牲。
39門廊肚擺等四張桌仔，這片有兩張，該片有兩張，做得在這兜桌頂㓾燒化祭、贖罪祭㧯贖過失祭个頭牲。
40門廊外个北門口有四張桌仔，這片有兩張，該片有兩張。
41恁樣，總共有八張桌仔做得用來㓾獻祭个頭牲，門廊肚四張，門廊外四張。
42門廊肚个四張桌仔係㓾燒化祭个頭牲用个。這兜桌仔係用石頭鑿成个，高五十公分，桌面七十五公分四方。㓾頭牲用个東西全部放在桌頂。
43桌仔四片各有七公分半闊个槽仔 。獻祭用个肉全部放在桌頂。
祭司个間房44該人帶𠊎到內院。內院有兩隻間房，一隻在北門堘頭，向南，另外一隻在南門堘頭，向北 。
45該人㧯𠊎講，向南个房間係給在聖殿工作个祭司用个，
46向北个間房係給在祭壇前工作个祭司用个。所有个祭司全部係撒督个後代。在利未支族中，只有佢等正做得到上主面前事奉佢。
內院㧯聖殿47該人量內院，係五十公尺四方，聖殿頭前有一隻祭壇。
48接等，佢帶𠊎到聖殿个前堂。佢量前堂个門口，深兩公尺半，闊七公尺 ，兩片个壁个柱𣎴賁各一公尺半。
49前堂闊十公尺，深六公尺 。上前堂有十隻 段仔。前堂門口兩片壁个柱𣎴堘各有一支柱仔。
Who We AreWhat We EelieveWhat We Do
2025 by iamachristian.org,Inc All rights reserved.
