以賽亞書 2 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

永遠个和平(彌迦書 4:1-3)

1下背係上帝給亞摩斯个孻仔以賽亞个異象，係有關猶大㧯耶路撒冷个信息。

2到最尾个日仔，

上主聖殿个山定著會建立在群山个頂高，

高高在上，超過眾山。

萬國全部會流向這山。

3盡多民族會聚集前來，講：

來啊，𠊎等共下上去上主个山 ，

共下來去雅各上帝个聖殿。

佢會指教𠊎等應該行个道；

𠊎等也愛行佢所指示个路。

上主个教訓對錫安發出；

佢个信息對耶路撒冷傳出來。

4佢會解決國際間个糾紛，

調解民族間个爭端。

佢等會將刀劍打做犁頭，

將矛槍打做鐮仔。

國際間毋會有相㓾，

佢等也毋使再學習戰爭。

5 雅各个後代啊！來啊，𠊎等在上主个光明中行！

驕傲个定著會失敗

6上帝啊，你已經㧒掉你个子民 — 雅各个後代；因為國內逐所在有對東方㧯非利士人來个邪術；人民全部跈外族个風俗。

7佢等國內金銀滿地，財寶多到算毋出；佢等境內滿遍係戰馬，還有算毋盡个戰車。

8佢等个所在充滿偶像；佢等拜自家用手雕刻个東西。

9卑賤人跪拜，尊貴人也跪下，自願敗壞。上主啊，求你毋好赦免佢等！

10佢等應當愛閃到巖石下，囥到地窿肚，想愛閃上主个發譴㧯佢威嚴个榮光。

11日仔將到，驕傲个人會受壓制，自大个人會降做卑賤；只有上主受尊敬。

12在該日，上主 — 萬軍个元帥愛將有權勢、自誇㧯驕傲个人降做卑賤。

13佢愛斬掉黎巴嫩高大个香柏樹，毀掉巴珊个橡樹；

14削平大細山岡，

15㩳橫高塔㧯堅固个城牆；

16沈掉他施盡靚个大船。

17在該日，驕傲个人會受壓制，自大个人會降做卑賤，只有上主受尊敬。

18偶像也會被佢完全除掉。

19上主搖動地基个時，人愛閃到巖石下，囥到地窿肚，想愛閃上主个發譴㧯佢威嚴个榮光。

20到該日，佢等愛㧹掉自家製造个金銀偶像，㧒給田鼠㧯蝠婆仔。

21上主搖動地基个時，人愛囥在山窿抑係巖石个縫肚，想愛閃上主个發譴㧯佢威嚴个榮光。

22毋好偎靠世間人，因為佢等會死，佢等算麼介呢？