詩篇 56 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

信靠上帝个祈禱 大衛在迦特被非利士人捉去以後所刻个詩 ，交給聖歌隊長，調用遠方橡樹頂个月鴿仔。

1上帝啊，憐憫𠊎，因為𠊎被人攻擊；

𠊎个仇敵歸日攻擊𠊎來壓迫𠊎。

2𠊎个敵人一直攻擊𠊎；

做𠊎對敵个有非常多！

3至高者啊，在𠊎著驚个時節，

𠊎愛倚靠你！

4𠊎信靠上帝，讚美佢个應許；

𠊎倚靠上帝，就毋使驚麼介。

血肉个人還能對𠊎樣般呢？

5𠊎个仇敵歸日想愛破壞𠊎；

佢等想盡一切辦法愛害𠊎。

6佢等聚集、埋伏，打探𠊎行个路；

佢等个目的就係愛收𠊎个命。

7上帝啊，求你責罰佢等个罪惡；

求你對佢等大發譴，打橫佢等。

8你清楚知𠊎所堵到个災難；

你將𠊎个目汁裝在你个皮袋肚。

這一切敢無記在你个書底背嗎？

9所以，𠊎一求喊你，仇敵就退走；

恁樣，𠊎就知，上帝係幫助𠊎个。

10𠊎信靠上帝，讚美佢个應許；

𠊎信靠上主，讚美佢个應許。

11𠊎倚靠上帝，就毋使驚麼介。

血肉个人還能對𠊎樣般呢？

12上帝啊，𠊎愛對你還願；

𠊎愛對你獻感謝个祭。

13因為你救𠊎脫離死亡，

使𠊎企到在在，無橫掉，

有好生活在上帝面前，

在該賜生命个光明中。