以賽亞書 63 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

上主打贏萬國

1「該對以東个波斯拉城來、著紅衫打扮當派頭个係麼人？該盡威風、大步行路个係麼人？」

就係有拯救大能个上主，佢來宣告佢个勝利。

2「做麼介佢著紅衫，像踏葡萄焗酒个人？」

3上主應講：「𠊎踐踏萬國，像踏葡萄一樣；無人來㧯𠊎𢯭手。𠊎發譴來踏佢等；𠊎大受氣來毀壞佢等；佢等个血打垃圾𠊎个衫。

4𠊎拯救吾子民个日仔一直在𠊎心中；𠊎責罰吾子民仇敵个日仔到了。

5𠊎看來看去，無人來幫助𠊎，無人來支持𠊎！𠊎越發譴，𠊎就越堅強，𠊎親手來打贏這場戰爭。

6𠊎發譴來踏萬國，大受氣來毀壞佢等；𠊎使佢等血流成河。」

上帝恩待以色列

7𠊎愛講起上主不變个慈愛；

𠊎愛讚美佢在𠊎等身上所做个事。

照佢个痛惜㧯豐盛个慈愛，

佢將盡多當好个福氣賜給以色列人。

8上主講：「佢等確實係𠊎个子民，係毋會行虛假个子民。」所以佢做佢等个救主。

9在佢等个苦難中，佢也受苦。拯救佢等个毋係天使，係上主自家 。因為佢个慈愛㧯憐憫，佢救贖佢等。佢頭擺時常將佢等揇等來揹，

10總係佢等悖逆佢，使佢个聖靈傷心。所以，上主變做佢等个仇敵，親自攻擊佢等。

11總係，佢个子民還係記得頭擺个事，記得摩西个日仔。佢等問：「上主在㖠位呢？佢識對海中救佢个子民㧯佢等个領袖。這下這個將佢个聖靈賜給摩西个上主在㖠位呢？

12-13佢識用佢个大能，通過摩西來行神蹟，將水分開，𢱋佢个子民經過深海，使人永遠記得佢个名。這下，佢在㖠位呢？」

上主識帶領佢个子民，使佢等个腳步穩定，就像馬在曠野，毋會絆倒。

14像帶牛群下到山壢，上主个靈俾佢等歇睏。佢恁樣帶領自家个子民，使自家个名得到稱頌。

求憐憫㧯幫助个祈禱

15上主啊，求你對天頂看顧𠊎等；求你對神聖、榮光个寶座關心𠊎等。你个大能㧯熱心在㖠位？你个慈愛憐憫在㖠位呢？求你毋好毋插𠊎等！

16你係𠊎等个阿爸。就算𠊎等个祖先亞伯拉罕㧯雅各

毋承認𠊎等；總係上主啊，你係𠊎等个阿爸，對古早到這下，你係𠊎等个救贖主。

17上主啊，你做麼介由在𠊎等離開你个道路？做麼介由在𠊎等恁硬頸，毋敬畏你呢？為到你該兜僕人，為到該兜一直屬你个人，求你回心轉意！

18𠊎等係你神聖个子民。𠊎等識被敵人逐出去；接等佢等就踐踏你个聖所。

19你對待𠊎等，就像你自從毋識治理過𠊎等，就像𠊎等從來毋係你个子民。