歷代志下 17 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

約沙法做猶大王

1 約沙法承接厥爸亞撒做王；佢堅強打拚，對抗以色列。

2佢將軍隊安營在猶大該兜防衛城㧯鄉村，並厥爸亞撒在以法蓮境內佔領个該兜城。

3上主㧯約沙法共下；因為佢學厥祖先大衛

早期个模範，無拜巴力。

4佢事奉厥爸个上帝，遵行上帝个命令，無做以色列該兜王所做个事。

5上主使約沙法在猶大國个統治堅固；猶大人民向佢獻禮物，所以佢非常好額，又當受人尊敬。

6佢看事奉上主做光榮，又廢掉在猶大所有山岡頂个神廟，㧯亞舍拉女神个柱像。

7佢在位个第三年，派官長便‧亥伊勒、俄巴底、撒迦利雅、拿坦業㧯米該亞到猶大逐城教導人民。

8㧯佢等共下去个有：示瑪雅、尼探雅、西巴第雅、亞撒黑、示米拉末、約拿單、亞多尼雅、多比雅、駝巴多尼雅九個利未人，以及以利沙瑪㧯約蘭兩個祭司。

9佢等帶等上主个法律書，行透猶大逐鄉鎮，教導人民。

約沙法个功勞

10上主使猶大四周圍鄰國全部毋敢㧯約沙法相㓾。

11有兜非利士人向約沙法進貢當多个銀仔㧯其他禮物；有兜阿拉伯人送給佢七千七百隻綿羊牯㧯七千七百隻山羊牯。

12所以約沙法越來越強盛。佢在猶大逐所在建築防衛城㧯城鎮，

13囤當多个貨物。

佢派勇敢个戰士看守耶路撒冷，

14照佢等所屬个宗族分派。押拿係猶大族軍隊个指揮官，手下有三十萬軍隊。

15副指揮官係約哈難，手下有二十八萬軍隊。

16再來係細基利个孻仔亞瑪斯雅，手下有二十萬軍隊。 (亞瑪斯雅係自願來事奉上主个。)

17 便雅憫族軍隊个指揮官係以利雅大；佢係一個勇敢个戰士，指揮二十萬拿盾牌㧯弓箭个軍隊。

18副指揮官係約撒拔，帶領十八萬裝備精良、隨時做得相㓾个軍隊。

19這兜人全部在耶路撒冷服事王。除這以外，王也派軍隊看守猶大其他个防衛城。