1 耶路撒冷个軍隊啊，愛團結起來！𠊎等被人包圍！敵人用杖仔打以色列領袖个嘴角。
對伯利恆來个統治者2上主講：「以法他地區个伯利恆啊，在猶大這兜城中，你係一個細城。總係𠊎愛對你該位，為以色列選立一個領袖；佢个家系對太初就有。」
3所以，上主愛將佢个子民交給佢等个敵人，直到該差毋多會生產个婦人家𫱔孻仔。然後，佢个同胞愛對被人捉去个所在轉到以色列人該位。
4佢愛䟘起來，愛像牧人照顧羊群恁樣；佢愛用上主所賜个大能，奉上主 — 佢上帝聖名个威嚴來統治佢个子民。佢等愛享受太平，因為該時全世界个人全部會承認佢个偉大。
5佢愛帶來和平。
解救㧯責罰亞述人侵佔𠊎等个土地，攻破𠊎等城堡个時，𠊎等愛派盡多最強个大將㧯佢等相㓾。
6這兜大將會用武力佔領亞述 — 寧錄个地。當亞述人侵略𠊎等國家个時，佢 會救𠊎等。
7在萬民中，還賸个該兜以色列人像係上主降下來个露水，像滋潤草木个甘霖。佢等倚靠上帝，毋倚靠人。
8在列國中，以色列還賸个人像係雄獅在樹林个百獸中，像係細獅仔撞入羊群中，去扯裂吞食，麼人也無法度抵擋。
9以色列愛征服敵人，完全毀滅佢等。
10上主講：「該時，𠊎愛滅掉你等个兵馬，打壞你等个戰車。
11𠊎愛毀滅你等國內个城市，拆掉所有个城堡。
12𠊎愛消滅你等个邪術，毋留下一個卜卦个。
13𠊎愛除滅你等所雕刻个偶像㧯石柱；你等毋會再拜自家个手所製造个東西。
14𠊎愛拆掉你等國內个亞舍拉女神像，毀滅你等个城市。
15𠊎愛大發譴來報復所有毋服從𠊎个國家。」
Who We AreWhat We EelieveWhat We Do
2025 by iamachristian.org,Inc All rights reserved.
