申命記 34 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1 摩西對摩押平原跋上尼波山，到耶利哥對面个比斯迦山頂高。上主在該位俾佢看到迦南全地：對基列到北片个但城、

2拿弗他利全地、以法蓮㧯瑪拿西地區、猶大全地、向西透到地中海、

3猶大个南部、㧯對瑣珥到棕樹城耶利哥中間个平原。

4上主對摩西講：「這歸垤土地就係𠊎應許亞伯拉罕、以撒、雅各愛賜給佢等子孫个。𠊎已經俾你親眼看到這垤土地，總係你做毋得入去。」

5恁樣，上主个僕人摩西就在摩押地過身，係照上主所講个。

6上主將佢埋在伯‧批珥城對面个摩押山壢；直到今晡日，無人知佢个墳墓在㖠位。

7摩西過身个時一百二十歲，身體還健，目珠也還盡金。

8以色列人民在摩押平原為摩西傷心大噭三十日，辦喪事个期間就滿了。

9 嫩个孻仔約書亞被智慧个靈充滿，因為摩西按手設立佢做繼承人。以色列人民就聽從約書亞，遵行上主通過摩西頒給佢等个誡命。

10 以色列中自從吂識有像摩西恁樣个先知；因為上主面對面認識佢。

11上主識派摩西對付埃及王、佢个官員，㧯埃及全國；無人能行摩西在該位所行个神蹟奇事。

12摩西也識在全以色列人民面前行當大當得人驚个事。