1上主啊，毋好毋記得大衛；
愛記得佢受个一切艱苦。
2上主啊，愛記得佢對你所許个願；
佢對雅各个全能者發誓講：
3「𠊎絕對毋轉屋下抑係上床，
4𠊎絕對毋睡目抑係啄目睡，
5直到𠊎為上主尋到地方，
為雅各个全能者尋到住个所在。」
6𠊎等聽講約櫃在以法他；
𠊎等在雅珥田間尋到它。
7𠊎等講：「來去上主住个所在；
𠊎等來去佢个寶座前跪拜。」
8上主啊，䟘起來，進入你休息个地方，
同顯示你大能个約櫃共下入聖所。
9願你个祭司著上公義；
願你忠心个子民歡呼。
10求你因為你僕人大衛个緣故，
毋好轉過身毋搭你選立个王。
11上主用信實對大衛發誓，
絕對毋會收轉去；佢講：
「𠊎愛立你一個孻仔做王；
𠊎愛使佢承接你个王位。
12你个子孫若遵守𠊎个約，
實行𠊎教佢等个法令，
佢等个子孫也會永永遠遠承接你个王位。」
13上主已經揀選錫安；
佢愛該地方做佢住个所在。
14佢講：「𠊎愛永遠住在這位；
這位係𠊎中意愛掌權个所在。
15𠊎愛供給錫安一切个需要；
𠊎愛使其中个窮苦人得到飽足。
16𠊎愛使眾祭司著上𠊎个救恩；
城內忠心个人民愛大聲歡呼！
17𠊎愛在這位興起大衛个一個後代，使佢做王；
𠊎愛庇佑𠊎所選立个王，使佢个王權堅固。
18𠊎愛使佢个仇敵失敗見笑，
總係佢个國度愛興旺昌明。」
Who We AreWhat We EelieveWhat We Do
2025 by iamachristian.org,Inc All rights reserved.
