詩篇 26 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

正直人个祈禱 大衛个詩。

1上主啊，求你宣判𠊎無罪，

因為𠊎做人正直；

𠊎倚靠上主，就毋驚跌倒。

2上主啊，求你鑒察𠊎，考驗𠊎；

求你察驗𠊎个心思㧯意念。

3你不變个慈愛常在𠊎面前；

𠊎一直照你个信實來行 。

4𠊎毋同虛虛假假个人來往，

也毋同該兜假好个人做伴。

5𠊎盡惱邪惡人个集會，

也無愛同佢等坐共下。

6上主啊，𠊎洗手來表明清白，

然後正𫟧等你个祭壇來行；

7𠊎大聲唱感謝个詩歌，

講起你一切奇妙个作為。

8上主啊，𠊎盡愛你住个聖殿，

就係你榮光顯現个所在。

9求你莫將𠊎个靈魂同罪人共下除掉；

莫使𠊎个性命同好㓾人个共下滅亡。

10佢等个行事充滿詭詐，

又常常接受人个收買。

11總係，𠊎照正直來行；

求你救贖𠊎，憐憫𠊎！

12𠊎个腳企在平平个地方；

𠊎愛在公共个聚會中頌讚上主！