民數記 29 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

新年獻个祭(利未記 23:23-25)

1七月初一，你等愛聚集敬拜，日常一切个工作都毋好做。該日，愛歕羊角，

2又獻上主所歡喜个清香燒化祭：一隻細牛牯，一隻綿羊牯，七隻一歲大个細羊牯，全部愛無缺點个。

3也愛獻幼麵粉攪橄欖油个素祭：該隻牛牯愛配三公斤幼麵粉；該隻綿羊牯配兩公斤幼麵粉；

4逐隻細羊牯配一公斤幼麵粉。

5又愛獻一隻山羊牯做贖罪祭，為人民行潔淨禮。

6除了這兜以外，逐隻月初一應該獻个燒化祭㧯素祭，並平常愛獻个燒化祭、素祭㧯祭酒照常愛來獻。這兜係上主所歡喜个清香火祭。

贖罪日獻个祭(利未記 23:26-32)

7七月初十，你等愛聚集敬拜；愛禁食、刻苦自家，日常一切个工作都毋好做。

8你等愛向上主獻清香个燒化祭：一隻細牛牯，一隻綿羊牯，七隻一歲大个細羊牯，全部愛無缺點个。

9也愛獻幼麵粉攪橄欖油个素祭：該隻牛牯愛配三公斤幼麵粉；該隻綿羊牯配兩公斤幼麵粉；

10逐隻細羊牯配一公斤幼麵粉。

11除了為人民行潔淨禮所獻个山羊牯㧯平常愛獻个燒化祭、素祭㧯祭酒以外，還愛獻一隻山羊牯做贖罪祭。

搭寮仔節獻个祭(利未記 23:33-44)

12七月十五，你等愛聚集敬拜，慶祝節期七日來紀念上主，日常一切个工作都毋好做。

13在節期个第一日，你等愛獻燒化祭，做清香个火祭，使上主歡喜。愛獻十三隻細牛牯，兩隻綿羊牯，十四隻一歲大个細羊牯，全部愛無缺點个。

14也愛獻幼麵粉攪橄欖油个素祭：逐隻牛牯配三公斤幼麵粉；逐隻綿羊牯配兩公斤幼麵粉；

15逐隻細羊牯配一公斤幼麵粉。

16除了平常愛獻个燒化祭、素祭㧯祭酒以外，還愛獻一隻山羊牯做贖罪祭。

17節期个第二日，你等愛獻十二隻細牛牯，兩隻綿羊牯，十四隻一歲大个細羊牯，全部愛無缺點个。

18也愛照細牛牯、綿羊牯㧯細羊牯个數目獻所配合个素祭㧯祭酒。

19除了平常愛獻个燒化祭、素祭㧯祭酒以外，還愛獻一隻山羊牯做贖罪祭。

20節期个第三日，你等愛獻十一隻細牛牯，兩隻綿羊牯，十四隻一歲大个細羊牯，全部愛無缺點个。

21也愛照細牛牯、綿羊牯㧯細羊牯个數目獻所配合个素祭㧯祭酒。

22除了平常愛獻个燒化祭、素祭㧯祭酒以外，還愛獻一隻山羊牯做贖罪祭。

23節期个第四日，你等愛獻十隻細牛牯，兩隻綿羊牯，十四隻一歲大个細羊牯，全部愛無缺點个。

24也愛照細牛牯、綿羊牯㧯細羊牯个數目獻所配合个素祭㧯祭酒。

25除了平常愛獻个燒化祭、素祭㧯祭酒以外，還愛獻一隻山羊牯做贖罪祭。

26節期个第五日，你等愛獻九隻細牛牯，兩隻綿羊牯，十四隻一歲大个細羊牯，全部愛無缺點个。

27也愛照細牛牯、綿羊牯㧯細羊牯个數目獻所配合个素祭㧯祭酒。

28除了平常愛獻个燒化祭、素祭㧯祭酒以外，還愛獻一隻山羊牯做贖罪祭。

29節期个第六日，你等愛獻八隻細牛牯，兩隻綿羊牯，十四隻一歲大个細羊牯，全部愛無缺點个。

30也愛照細牛牯、綿羊牯㧯細羊牯个數目獻所配合个素祭㧯祭酒。

31除了平常愛獻个燒化祭、素祭㧯祭酒以外，還愛獻一隻山羊牯做贖罪祭。

32節期个第七日，你等愛獻七隻細牛牯，兩隻綿羊牯，十四隻一歲大个細羊牯，全部愛無缺點个。

33也愛照細牛牯、綿羊牯㧯細羊牯个數目獻所配合个素祭㧯祭酒。

34除了平常愛獻个燒化祭、素祭㧯祭酒以外，還愛獻一隻山羊牯做贖罪祭。

35節期个第八日，你等愛聚集敬拜，日常一切个工作都毋好做。

36愛獻燒化祭做清香个火祭，使上主歡喜。愛獻一隻細牛牯，一隻綿羊牯，七隻一歲大个細羊牯，全部愛無缺點个。

37也愛照細牛牯、綿羊牯㧯細羊牯个數目獻所配合个素祭㧯祭酒。

38除了平常愛獻个燒化祭、素祭㧯祭酒以外，還愛獻一隻山羊牯做贖罪祭。

39這兜係有關你等在規定个節期應該向上主獻燒化祭、素祭、祭酒、㧯平安祭个條例。這兜係你等還願㧯甘心獻个祭以外固定愛獻个。

40 摩西就將上主命令佢个話全部吩咐以色列人。