使徒 8 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1殺害司提反這件事，掃羅盡贊成。

掃羅迫害教會

對該日開始，耶路撒冷个教會受到非常厲害个迫害。使徒以外，所有个信徒分散到猶太㧯撒馬利亞个各所在去。

2有兜虔誠个人將司提反埋起來，為佢傷心大噭。

3這時，掃羅就進行迫害教會个工作；佢一家一家去搜查，捉男女信徒，拉去坐監。

福音傳到撒馬利亞

4該兜分散个信徒去到逐所在傳福音。

5腓利到撒馬利亞个一座城去，向該位个人傳基督个事。

6眾人全部認真聽腓利所講个話。佢等一片聽，一片看佢所行个神蹟。

7盡多邪靈大聲喊，對所附身个人底背出來；盡多癱風个、瘸腳个，也全部得到醫好。

8該城就充滿歡喜。

9有一個人，名安到西門，佢在該城行邪術，使撒馬利亞个人民盡希奇。佢恅到自家盡會；

10所有个人，無論大大細細，全部聽從佢，講：「這個人有上帝个能力，係『大能者』。」

11因為佢行邪術迷惑佢等有盡久个時間，所以佢等聽從佢。

12總係，到佢等相信腓利所傳關係上帝國个福音㧯耶穌基督个名，佢等無論男女就攏總領洗禮。

13西門自家也相信；佢領洗禮後，常常同腓利共下。佢看到腓利所行个神蹟㧯大奇事，就盡希奇。

14在耶路撒冷个使徒聽到撒馬利亞人接受上帝个道理，就派彼得㧯約翰到佢等該位去。

15兩個人一到，就為信徒祈禱，愛俾佢等領受聖靈，

16因為該時聖靈還吂臨到佢等當中任何一個人；佢等只有奉主耶穌个名接受洗禮定定。

17所以彼得㧯約翰為佢等按手，佢等就領受聖靈。

18 西門看到使徒一按手，人就領受到聖靈，佢就拿錢給使徒，

19講：「請將這能力也給𠊎，使𠊎為麼人按手，麼人就會領受聖靈。」

20總係彼得對佢講：「你同你个錢共下毀滅了！你樣會妄想上帝个恩賜做得用錢來買啊！

21𠊎等个工作你無份；因為在上帝个面前，你个心無正。

22所以你愛悔改，離開這個罪惡，並懇求主；或者你心中个意念會得到赦免。

23𠊎看得出，你充滿嫉妒个艱苦，被罪惡捆綁。」

24 西門對彼得㧯約翰講：「求你等為𠊎向主祈禱，使你等所講个事，毋會發生在𠊎个身上。」

25 彼得㧯約翰在該位做見證，傳主个道理，然後倒轉去耶路撒冷。路上，佢等也在撒馬利亞个多多村莊傳福音。

腓利㧯衣索匹亞个太監

26有主个一個天使㧯腓利講：「䟘起來，向南片行，到該條對耶路撒冷透到迦薩个路上去。」 (這條路已經無人行 。)

27腓利就出發去。在該條路上，佢堵到一個太監，係衣索匹亞个大官，在衣索匹亞女王甘太基个手下管錢；佢已經上耶路撒冷去敬拜上帝，

28該時愛轉去，坐在馬車頂讀先知以賽亞个書。

29聖靈㧯腓利講：「你過去，在車仔堘頭行。」

30腓利就走過去，聽到太監讀先知以賽亞个書，就問佢：「你所讀个，有明白麼？」

31佢應講：「無人教𠊎，樣會明白？」佢就請腓利上車，同佢共下坐。

32佢所讀該段聖經係：

佢像被人牽去㓾个羊仔，

又像被人剪毛个細羊仔恬恬；

佢也係恁樣，一句話毋講。

33佢被人欺負；

無人代佢主持公義。

無人講得出佢个後代，

因為佢个生命已經被人對世間除掉。

34太監問腓利講：「請問，先知這話係指麼人講个？係講佢自家，抑係別人？」

35腓利就開口，對這段聖經開始，㧯佢講關係耶穌个福音。

36佢等經過一個地方，路堘有水，太監講：「這位有水，𠊎領洗禮敢做毋得？」

38太監就吩咐停車；腓利同佢共下落去水中，為佢行洗禮。

39佢等對水中上來以後，主个靈將腓利忽然帶走；太監無再看到佢，就歡歡喜喜繼續趕路。

40後來，有人在亞鎖都堵到腓利；佢行遍該一帶地方，在逐個鄉鎮傳福音，直到凱撒利亞。