1上帝啊，𠊎等識親耳聽過，
𠊎等个祖先㧯𠊎等講過：
頭擺，在佢等个時代，
你所行个一切大事。
2你用你个權能將外族人逐出去，
在佢等个土地上栽培𠊎等个祖先；
你責罰該兜外族个人，
反轉使𠊎等个祖先得到興旺。
3𠊎等个祖先毋係靠刀劍征服該地，
也毋係靠自家个能力得到勝利；
係靠你个手，你个能力，你个同在，
因為你惜佢等。
4你係𠊎个王，𠊎个上帝；
你使 雅各你个子民打贏。
5通過你个大能，𠊎等將敵人打橫；
靠你个名，𠊎等踐踏攻擊𠊎等个。
6𠊎無倚靠自家个弓；
𠊎个劍也毋會救𠊎。
7只有你救𠊎等脫離敵人，
使該兜怨恨𠊎等个澇潰。
8𠊎等愛常常讚美上帝！
𠊎等愛永遠感謝你！
9這下，你卻放掉𠊎等，使𠊎等受侮辱；
你無愛再同𠊎等个軍隊共下出戰。
10你使𠊎等在仇敵个面前打輸退後；
該兜怨恨𠊎等个將𠊎等搶到淨淨。
11你使𠊎等像羊仔被人㓾，
將𠊎等分散在列國當中。
12你將自家个子民便宜賣掉；
你無因為恁樣得到麼介利益 。
13你使𠊎等受鄰國个羞辱；
周圍个人嘲謔𠊎等，笑𠊎等。
14你使𠊎等成做列國个笑話；
萬國个人全部搖頭笑𠊎等。
15羞辱常常在𠊎面前，
𠊎滿面被見笑遮等；
16因為聽到个係嘲謔譭謗个聲，
看到个係對敵㧯愛報仇个人。
17這兜事情發生在𠊎等个身上，
總係，𠊎等從來毋識毋記得你，無違背你个約。
18𠊎等毋識對你無忠心，
也毋識反抗你个命令；
19總係你磧碎𠊎等，又放𠊎等在野狗个中間，
俾𠊎等在死亡个陰影中。
20𠊎等若毋記得𠊎等个上帝，
向外族人个神明祈禱，
21上帝一定會查出來，
因為佢深知人心个祕密。
22事實上，𠊎等為你个緣故歸日等死；
人看𠊎等像係愛㓾个羊。
23主啊，好醒了！樣般還睡目呢？
好䟘了！毋好永遠拒絕𠊎等！
24你做麼介揞等你个面毋搭𠊎等呢？
樣會毋記得𠊎等受个苦難㧯迫害？
25𠊎等橫在地上，
歸身仆到貼貼。
26求你䟘起來幫助𠊎等！
因為你不變个慈愛，求你救贖𠊎等！
Who We AreWhat We EelieveWhat We Do
2025 by iamachristian.org,Inc All rights reserved.
