1上主㧯𠊎講話；
2佢講：「人子啊，這就係𠊎 — 至高个上主愛對以色列地宣佈个話：以色列該死了，全地个結束近了！
3「以色列啊，你个結束到了。𠊎愛向你發出𠊎个大發譴。𠊎愛因為你所做个事審判你；𠊎愛因為你邪惡个行為責罰你。
4𠊎毋饒你，也毋憐憫你。𠊎愛因為你所做邪惡个事責罰你。恁樣，你就會知𠊎係上主。」
5至高个上主恁樣講：「災難愛一擺又一擺 臨到你。
6該死了，結局近了。你知死了！
7以色列人民个結局到了。山頂个祭壇毋會再有歡樂，只有混亂；該日仔會到了。
8「𠊎當遽就愛向你拚出𠊎个大發譴。𠊎愛照你所做个事審判你；𠊎愛照你所做邪惡个事責罰你。
9𠊎毋饒你，也毋憐憫你。𠊎愛照你所做邪惡个事責罰你。恁樣，你就會知係𠊎上主在責罰你。」
10災難个日仔到了。逐位都有暴力㧯驕傲个事發生。
11殘暴成做壞人个權勢。以色列人个財產、體面、光彩全部無了。
12時機到了，日仔近了；買个人毋使歡喜，賣个人也毋使憂愁；因為上帝个大發譴會臨到逐儕个身項。
13無一個生理人在還生个時賺得轉佢所損失个，因為上帝个大發譴會臨到逐儕个身項。壞人做毋得生存。
14號角響了；逐儕準備好了。總係無人出去相㓾，因為上帝个大發譴會臨到逐儕个身項。
責罰以色列个罪惡15外背有戰爭，內肚有發瘟、飢荒。城外个人全部愛死在刀劍下；城肚个人全部愛病死、餓死。
16有兜人愛像山壢肚著驚个月鴿仔逃到山頂去。佢等全部為自家个罪盡噌。
17逐儕全部手軟腳攋。
18佢等愛著麻衫，全身愊愊掣，剃光頭，盡見笑。
19佢等愛將金銀㧹到街項，就像豁掉垃圾。因為在上主大發譴个日仔，金銀救毋到佢等。金銀無法度滿足佢等个慾望，也無法度使佢等个肚笥食飽。金銀反轉引誘佢等犯罪。
20佢等識誇口佢等个珠寶盡靚，總係佢等用該兜珠寶造邪惡个偶像。所以，上主使佢等看自家个珠寶做垃圾。
21上主講：「𠊎愛俾外國人來搶佢等，喊無天良个人搶奪佢等个珠寶，又大大侮辱。
22𠊎所寶貴个聖殿被人褻瀆个時，強盜入去、侮辱它个時，𠊎絕對毋會干涉。
23「全國混亂 。地面上兇殺充滿，城市肚殘暴个事滿遍係。
24𠊎愛將盡惡个民族帶到這位來，佔領你等个屋仔。𠊎俾列國褻瀆你等敬拜場所个時，你等盡強个勇士也無半些膽量。
25毀滅个時到了！你等愛求和平，總係毋會有和平。
26災難緊發生；壞消息連連來。你等會尋先知求異象；祭司無麼介好教人；長老也毋會計劃。
27君王緊噌，領袖當失望；人民著驚到愊愊掣。𠊎愛因為你等所做个事責罰你等；你等樣般審判別人，𠊎也愛樣般審判你等。恁樣，你等就會知𠊎係上主。」
Who We AreWhat We EelieveWhat We Do
2025 by iamachristian.org,Inc All rights reserved.
