歷代志上 18 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

大衛軍事上个勝利(撒母耳記下 8:1-14)

1後來，大衛又攻擊非利士人，打贏佢等，佔領迦特城㧯附近个村莊。

2 大衛也打贏摩押人，使摩押人歸順佢，向佢進貢。

3接等，大衛在哈馬附近攻打敘利亞个瑣巴王哈大底謝，因為哈大底謝想愛堅固幼發拉底河上游地區个統治權。

4大衛搶走佢个戰車一千輛，捉到騎兵七千人、步兵兩萬人。對捉來个馬當中，大衛留下愛拖一百輛戰車罅額个戰馬，將其他戰馬个腳筋全部剁斷。

5 大馬士革个敘利亞人派軍隊去幫助瑣巴王哈大底謝个時，大衛攻打佢等，㓾掉兩萬兩千人。

6然後，大衛派軍隊駐在大馬士革、敘利亞人个國內；佢等全部歸順大衛，向佢進貢。大衛無論去到㖠位，上主使佢逐擺打贏。

7大衛搶到哈大底謝該兜軍官所拿个金盾牌，帶轉耶路撒冷去，

8又對哈大底謝統治个兩隻城市提巴㧯均搶到盡多个銅。 (後來所羅門用這兜銅鑄造聖殿个銅海、銅柱㧯銅器。)

9 哈馬王陀以聽講大衛打贏瑣巴王哈大底謝个全軍，

10就派佢个孻仔哈多蘭

去向大衛王請安，祝賀佢得到勝利 (原來陀以㧯哈大底謝時常相㓾。) 哈多蘭帶來金、銀、銅製造个禮物送給大衛。

11大衛王將這兜禮物連同佢對其他國家搶來个金銀，就係對佢所征服个以東、摩押、亞捫、非利士、㧯亞瑪力搶來个，攏總分別為聖獻給上主。

12 亞比篩 (厥姆係洗璐雅) 在鹽谷㓾掉一萬八千以東人。

13佢派軍隊駐在以東个逐地方；該地方个人民全部歸順大衛。大衛無論去到㖠位，上主使佢逐擺打贏。

大衛个大臣(撒母耳記下 8:15-18)

14 大衛統治全以色列，向人民實行公義。

15洗璐雅个孻仔約押做元帥；亞希律个孻仔約沙法做歷史官；

16亞希突个孻仔撒督㧯亞比亞他个孻仔亞希米勒做祭司；西萊雅

做王室書記；

17耶何耶大个孻仔比拿雅做大衛个侍衛長、統管基利提人㧯比利提人；大衛該兜孻仔在王身邊个官員當中做領袖。