希伯來書 13 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

樣般得上帝个歡喜

1你等愛一直像兄弟姊妹恁樣相惜。

2毋好毋記得接待外鄉人去你等屋下。識有人恁樣行，無意中卻接待到天使。

3愛關心該兜坐監个人，像係你等也同佢等共下坐監。愛關心該兜在患難中个人，就像你等也在患難中一樣。

4每一個人攏總愛尊重婚姻；夫妻愛彼此忠實。上帝會審判該兜放蕩㧯淫亂个人。

5你等个人生毋好總係想愛賺錢；愛滿足自家所有个。因為上帝識講：「𠊎絕對毋會離開你，永遠毋會㧒掉你。」

6所以，𠊎等做得大膽講：

主係𠊎个幫助，

𠊎毋使驚；

人能對𠊎樣般哪？

7你等愛紀念頭擺帶領你等、傳上帝个真道給你等个人。好好想看仔，佢等係樣般生活，樣般死；你等愛效法佢等个信心。

8耶穌基督昨晡日、今晡日、直到永遠，也毋會改變。

9毋好俾各樣奇怪个學說將你等帶走趲去。你等个心愛倚靠上帝个恩典來得到堅固，毋好倚靠食物个例規；照該兜例規去行个人並無得到麼介好處。

10在聖帳篷底背事奉个猶太祭司，無權好食𠊎等祭壇頂个祭物。

11猶太个大祭司將頭牲个血帶入至聖所，獻做贖罪祭；總係該兜頭牲个身體係在營外燒。

12所以，為到愛用自家个血來潔淨人个罪，耶穌就受苦，死在城外。

13恁樣，𠊎等來去營外就近佢，分擔佢所受个侮辱。

14因為在世間，𠊎等無永遠存在个城；𠊎等所追求个係將來个城。

15所以，𠊎等應該通過耶穌，常常用頌讚做祭物來獻給上帝，就係用𠊎等个嘴告白佢个名。

16總係，也毋好毋記得行善㧯彼此分享，因為這種个祭物係上帝所歡喜个。

17愛服從你等个領袖，聽佢等个指導。佢等一直看顧你等个靈魂，因為佢等愛對上帝負責，像愛交帳一樣。你等聽從佢等，佢等就會做到盡歡喜；若無，佢等會冷心透大氣，這對你等有麼介利益呢？

18請你等繼續代𠊎等祈禱。𠊎等自信良心清白，樂意隨時隨地行正路。

19𠊎特別愛請你等代𠊎祈禱，使𠊎盡遽倒轉你等該位去。

祈禱

20-21上帝已經使𠊎等个主耶穌對死復活。佢通過耶穌所流个血印證了永遠个約，使佢成做眾羊群个大牧者。願賜平安个上帝成全你等，使你等行逐樣个好事，來遵行佢个旨意！願佢通過耶穌基督在𠊎等身上成就佢所歡喜个事！願榮耀歸給基督，直到永永遠遠！阿愐。

結尾个話

22兄弟姊妹啊，𠊎求你等耐心聽𠊎个勸勉；因為𠊎寫給你等个信仔，並毋係盡長。

23𠊎報你等知，𠊎等个兄弟提摩太已經得到釋放了。佢若係較早來，𠊎會同佢共下去看你等。

24請代𠊎等對你等所有个領袖㧯眾聖徒請安。對意大利來个人全部也對你等請安。

25願上帝賜恩典給你等大家！