傳道書 4 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1𠊎又看到日頭下所有無公平个事。被人欺負个流目汁，無人安慰佢等。佢等得毋到安慰，因為欺負佢等个人有權有勢。

2𠊎欣慕該兜死掉个人，佢等比還生个人較幸福。

3總係，吂出世、吂看過日頭下所發生無公平个事个人，比以上兩種人還較幸福。

4𠊎又發現：人勞碌工作，追求功名，係因為愛㧯鄰舍競爭。這也係空虛，也係捉風。

5有人講：「戇人閒亍亍，餓死自家。」

6總係，一手捧滿滿，平安享受，贏過雙手捧滿滿，勞碌捉風。

7𠊎又看到日頭下有兜空虛个事：

8有人孤單一儕，無孻仔，也無兄弟，總係歸日勞碌，自從毋識滿足所得到个財富。佢講：「𠊎辛辛苦苦，犧牲享受，到底係為麼人呢？」這也係空虛，也當衰過。

9兩儕比一儕較好，因為兩儕合作效果較好。

10一儕跌倒，另外一儕做得扶佢䟘起來。若係孤單一儕，跌倒个時無人扶佢䟘起來，佢就當衰過了。

11兩儕共下睡較燒暖，一儕自家睡樣會燒呢？

12兩儕團結能打贏一儕个攻擊，單獨一儕抵抗就無把扼。三股个索仔無恁遽拉斷。

13-14對監獄出來个後生人有可能做王，出身窮苦个也有可能做王 ；窮苦總係有智慧个後生人，贏過年老个時毋肯接受勸話个戇檔王。

15𠊎發現住在這世間，有一大群人跈等該 後生人活動；佢䟘起來做王，將舊王換掉。

16這個新王雖然有辦法管理盡多个人民；總係後來个人還係毋滿意佢个統治。這也係空虛，也係捉風。