哥林多前書 13 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1𠊎就係會講世間各種个話，甚至係天使个話，若係無愛心，𠊎个話就像吵人个銅鑼㧯響个鑇仔共樣。

2𠊎就係有先知講道个才調，又會了解各種奧妙㧯智識，甚至有堅強个信心會移山倒海，若係無愛心，𠊎就毋算麼介。

3𠊎就係將所有个財產拿來救濟人，甚至犧牲自家个身體被人燒 ，若係無愛心，𠊎所做个就無麼介利益。

4有愛心就會有吞忍㧯慈悲；有愛心就毋會嫉妒，毋會誇口，毋會驕傲，

5毋會做見笑个事，毋會自私，毋會隨便發譴，無記等別人个過失，

6毋歡喜不義，只有歡喜真理。

7有愛心就會包容一切，凡事有信心，事事存希望，樣樣能忍耐。

8愛心永遠存在。講道个才調係暫時个；屬靈个語言有一日會停止；智識也會無路用。

9因為𠊎等个智識有限，講道个恩賜也有限；

10總係，完全个一來到，有限个就會無掉去。

11𠊎做細人仔个時節，講話像細人仔，心思像細人仔，意念像細人仔；成人以後，𠊎就將細人仔个事㧒掉去。

12𠊎等這下所看到个，就像照銅鏡所看到个影像，濛濛；將來就會面對面看到清清楚楚。𠊎這下對上帝个認識無完全；將來就會完全，就像上帝完全認識𠊎一樣。

13信心、希望、㧯愛心，這三樣係永遠存在个；其中最重要个係愛心。