1接等，提幔人以利法應約伯講：
2聰明人會講空虛个話麼？
佢敢會緊講肨風个話麼？
3佢絕對毋會像你講無利益个話，
毋會講無價值个話為自家辯論。
4像你恁樣，愛樣般敬畏上帝？
人㖠有可能在佢面前祈禱？
5你所講个話顯出你个邪惡；
你想用詭詐个話保護自家。
6樣愛使𠊎來指出你个毋著？
你个話已經定你自家有罪。
7你恅到自家係世間第一個出世个人？
上帝創造高山个時你已經在場係麼？
8敢講你聽過上帝个計劃嗎？
人類个智慧愛你正有係麼？
9有麼介事你知，總係𠊎等毋知？
有麼介事你明白，𠊎等毋明白？
10𠊎等係㧯頭那毛白个老人家學个；
佢等比若爸還較老呢！
11你樣般愛拒絕上帝个安慰呢？
你看輕𠊎等溫和个勸話係麼？
12你个心做麼介無平安？
你个目珠做麼介發火？
13你恁樣係向上帝發譴呢！
你樣做得對佢講該種話？
14世間人係麼介，敢有人正經淨浰？
婦人家所𫱔个，敢有人可能無罪？
15上帝連該兜天使也毋信任；
在佢看來，天乜無淨浰。
16何況犯罪像啉水个世間人；
人樣般得人惱，樣般敗壞啊！
17 約伯啊，你愛聽𠊎个勸話；
𠊎愛將𠊎个經驗㧯你講。
18這兜係祖先傳下來个真理，
該兜智慧人全無保留教𠊎。
19佢等个土地無被外族統治；
也無外族人㧯佢等住共下。
20壞人一生个日仔受盡痛苦，
強暴人一生个年日也共樣。
21得人驚个聲常常在厥耳公肚，
佢恅到安全个時，強盜就來到。
22佢毋信做得對烏暗逃走，
因為有刀劍等等愛㓾佢，
23鷹鳥等等愛食佢个屍體 。
佢知頭前只有烏暗个日仔；
24災難、困苦像一個強大个王，
等等愛來嚇佢，愛攻打佢。
25因為佢反抗上帝，
驕傲藐視全能者。
26佢硬頸毋肯順服，
擎盾牌攻擊上帝。
27佢个面皮油濟濟；
佢个腰圈肚弛弛。
28佢像一個人搶到城市，
佔領無人住个屋仔，
後來个戰爭還係會打壞這兜城市㧯屋仔。
29佢豐富个財產留毋會久，
連產業个影仔也會無掉。
30佢無法度對烏暗逃走；
佢愛像樹枝被火燒掉；
它个花 被風吹毋見掉。
31佢若係倚恃虛假欺騙自家，
將來虛假會成做佢个報應。
32日期吂到，佢會先燥掉 ，
像樹枝燥掉，毋會青綠。
33佢會像葡萄樹，葡萄吂熟就落粒，
又像橄欖樹，一開花黏時就謝掉。
34無敬畏上帝个人將會無子孫；
靠歪哥來起个屋會被火燒掉。
35這兜人設計謀，又做壞事；
心肝肚所預備个係詭詐。
Who We AreWhat We EelieveWhat We Do
2025 by iamachristian.org,Inc All rights reserved.
