詩篇 46 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

上帝㧯𠊎等同在 可拉後代个詩歌，交給聖歌隊長，用高音來唱。

1上帝係𠊎等个避難所㧯力量，

係𠊎等患難中及時个幫助。

2-3所以，雖然有大地動，

高山崩掉，落到海中，

雖然海浪滔天，群山搖動，

𠊎等也毋驚。

4有一條河壩將喜樂帶到上帝个城，

到至高者住个聖所。

5上帝在城中，城就毋會橫掉；

天一光，上帝个援助就會到。

6萬邦騷動，列國橫掉；

上帝響雷公，大地就溶掉。

7上主 — 萬軍个元帥㧯𠊎等同在；

雅各个上帝係𠊎等个城堡！

8來啊，來看上主个作為；

看佢在地上所做个奇事。

9佢平定世界个戰亂；

佢拗斷弓箭，將槍斬斷，火燒盾牌。

10佢講：「恬恬！愛知𠊎係上帝！

在萬國中𠊎係至尊个，

在全地上𠊎係至高个。」

11上主 — 萬軍个元帥㧯𠊎等同在；

雅各个上帝係𠊎等个城堡！